МҮХАҮТ АЖЛЫН БАЙРАН ДАХЬ СУРГАГЧ, ДАДЛАГАЖУУЛАГЧ БЭЛТГЭХ ХӨТӨЛБӨРИЙГ ХЭРЭГЖҮҮЛЖ БАЙНА
Монголын Үндэсний Худалдаа Аж Үйлдвэрийн Танхимаас аж ахуйн нэгж, компаниудын инженер, техникч, ажилтнуудад зориулсан “Ажлын байран дахь сургагч, дадлагажуулагч” бэлтгэх хөтөлбөрийн сургалтыг 2026 оны 6 дугаар сарын 9-нөөс 13-ны өдрүүдэд зохион байгууллаа.
Уг хөтөлбөр нь ажлын байран дээр мэдлэг, ур чадвар, хандлагыг олон улсын арга зүйгээр хүргэх, хүний нөөцийн тасралтгүй хөгжлийг хангахад шаардлагатай арга зүй, ойлголтуудыг цогцоор нь эзэмшүүлдэг онцлогтой юм.
Мэргэжлийн болон техникийн боловсрол, сургалтын хосмог хэлбэрийг үр дүнтэй хэрэгжүүлэхэд компани дээрх сургагчид онцгой үүрэгтэй байдаг бөгөөд орчин үеийн бизнесийн орчинд шинэ ажилтныг богино хугацаанд дасан зохицуулах, мэргэжлийн ур чадварыг онол практик хослуулан эзэмшүүлэх нь байгууллагын өрсөлдөх чадварт шууд нөлөөлдөг байна.
Тийм ч учраас өнөөдөр компаниуд хүний нөөцөө бүрдүүлэхэд гарсан зардлыг зардал бус хөрөнгө оруулалтад тооцож, сургалтын өгөөжийг нэмэгдүүлэхэд онцгойлон анхаарах болжээ.
