ОЛОН УЛСЫН ХУДАЛДААНЫ ТАНХИМЫН ОЛОН УЛСЫН МАГАДЛАН ИТГЭМЖЛЭГДСЭН ГАРАЛ ҮҮСЛИЙН НЭГДСЭН СҮЛЖЭЭНД НЭГДЛЭЭ
Франц Улсын Парис хотноо энэ оны зургаадугаар сарын 2-ноос 6-ны өдрүүдэд Олон Улсын Худалдааны Танхим (ICC) болон Дэлхийн Танхимуудын Холбоо (WCF)-ноос зохион байгуулсан Олон Улсын Гарал Үүслийн Гэрчилгээний зөвлөл болон Дэлхийн АТА карнейн зөвлөлийн уулзалтад МҮХАҮТ-ын Үзэсгэлэн Яармагийн газрын ахлах мэргэжилтэн Ц.Хулан амжилттай оролцоод ирлээ.
Парис хотод төвтэй, 1919 онд байгуулагдсан, өдгөө 170 гаруй орныг эгнээндээ нэгтгэсэн Олон Улсын Худалдааны Танхим нь дэлхийн бизнесийн хамгийн том төлөөллийн байгууллага бөгөөд чөлөөт, шударга худалдааны орчныг бүрдүүлэх, бизнесийн нийтлэг стандарт тогтоох чиглэлээр үйл ажиллагаа явуулдаг юм.
Тус уулзалтад 42 улсын худалдаа аж үйлдвэрийн танхимын 60 гаруй төлөөлөгч оролцсон бөгөөд чөлөөт худалдааны хэлэлцээрийг хэрэгжүүлэхэд тулгарч буй сорилтуудыг хэлэлцэж, гарал үүслийн гэрчилгээ олгох практик туршлагаа хуваалцлаа.
Энэхүү хурлын үеэр Монгол Улсын гадаад худалдааны салбарт нэгэн чухал үйл явдал болсон нь МҮХАҮТ-аас олгодог экспортын барааны гарал үүслийн гэрчилгээг тус хорооны удирдах зөвлөлд танилцуулан баталгаажуулсан явдал байв.
Улмаар МҮХАҮТ нь "ICC WCF CO" олон улсын магадлан итгэмжлэлийн сүлжээнд албан ёсоор нэгдэж, тус нэр хүндтэй шошгыг ашиглах бүрэн эрхийг авснаар уг сүлжээний 43 дахь гишүүн улс боллоо. Энэхүү сүлжээнд нэгдсэнээр Монгол Улсаас экспортлогдож буй бараа бүтээгдэхүүний гарал үүслийн гэрчилгээ олон улсад илүү найдвартай баталгаажиж, хил дамнасан худалдааны урсгал ямар нэгэн саадгүй, тасралтгүй үргэлжлэх томоохон боломж бүрдэж байна.
Мөн зургаадугаар сарын 4-нөөс 5-ны өдрүүдэд үргэлжлэн хуралдсан Дэлхийн АТА Карнейн зөвлөлийн хуралд 44 орны 60 гаруй төлөөлөгч цугларч, Австри, Канад, Швейцар, Хятад, Францын Парис Иль-де-Франц бүс болон Нидерландын худалдааны танхимуудыг удирдах зөвлөлийн гишүүнээр сонголоо.
Уг хурлаар онцолсон гол шинэчлэл нь энэ оны зургаадугаар сарын 1-ний өдрөөс эхлэн Европын Холбооны 27 улс болон Швейцар, Норвеги, Их Британи зэрэг 30 гаруй оронд "Цахим АТА карней" систем албан ёсоор хэрэгжиж эхэлсэн явдал байв. Зөвхөн зургаадугаар сарын 1-нээс 7-ны хооронд гэхэд олон улсын хэмжээнд 4,362 цахим АТА карней олгогдоод байгаа бөгөөд анхдагч улс орнууд өөрсдийн сайн туршлагаа бусад оролцогчидтой хуваалцсан байна.
Энэхүү шинэ систем нь цахимжсан улс орнууд руу бараа бүтээгдэхүүнийг түр хугацаагаар, гаалийн татваргүйгээр нэвтрүүлэх үйл ажиллагааг урьд өмнөхөөсөө илүү хялбарчилж байгаа юм. Үйлчлүүлэгчид АТА карней олгогч байгууллагаас өөрийн ID болон PIN кодыг хүлээн авч, зориулалтын аппликэйшнд нэвтрэн мэдээллээ оруулснаар хилээр нэвтрэх үед гаалийн байцаагч цахимаар баталгаажуулж, улмаар аялал дуусах үед тус байгууллагад мэдэгдэх замаар бичиг баримтын бүх процессыг бүрэн цахим хэлбэрт шилжүүлж, цаг хугацаа болон зардлыг үлэмж хэмнэх боломжтой болжээ.
