“ОЛОН УЛСЫН ХӨДӨЛМӨРИЙН ХЭМ ХЭМЖЭЭ” СЭДЭВТ ОЛОН УЛСЫН КУРС СУРГАЛТ БОЛЛОО

МҮХАҮТ-ын Бодлого, стратегийн газрын хуулийн мэргэжилтэн Ц.Ариунжаргал Олон улсын хөдөлмөрийн байгууллага (ОУХБ)-ын дэмжлэгтэйгээр Итали Улсын Турин хот дахь ОУХБ-ын Олон улсын сургалтын төвөөс зохион байгуулагдсан “Олон улсын хөдөлмөрийн хэм хэмжээ” сэдэвт олон улсын курс сургалтад хамрагдлаа.

Тус сургалт нь эхний шатанд цахим хэлбэрээр, үргэлжлээд Итали Улсын Турин хотод танхимаар хослон зохион байгуулагдсан бөгөөд хөдөлмөрийн эрхийн хэрэгжилтийг хангах, олон улсын хөдөлмөрийн хэм хэмжээг гүнзгийрүүлэн судлах, холбогдох зөвлөлдөх уулзалт, хэлэлцүүлэгт оролцох чадавхыг бэхжүүлж, Үндсэн хуулиар хүлээсэн үүргээ биелүүлэх зорилготой байв.

Хөтөлбөрийн хүрээнд олон улсын хөдөлмөрийн конвенц, протокол, зөвлөмжийг батлах, гишүүн улс нэгдэн орох, хэрэгжүүлэх процедур, эвлэлдэн нэгдэх эрх ба хамтын хэлэлцээр, албадан болон хүүхдийн хөдөлмөрийг устгах асуудлуудыг хөндсөнөөс гадна хөдөлмөр эрхлэлт болон мэргэжлийн тэгш боломж, хөдөлмөрийн аюулгүй байдал, эрүүл ахуй, гурван талт зөвлөлдөх уулзалт, стандартын хяналтын механизм (СХМ), эдийн засаг дахь зохистой хөдөлмөр зэрэг өргөн хүрээний сэдвүүдийг хамарсан байна.

Энэхүү сургалт нь ажил олгогчийн төлөөллийн байгууллага болох МҮХАҮТ-ын хувьд олон улсын хөдөлмөрийн хэм хэмжээтэй холбоотой зөвлөлдөх уулзалт, хэлэлцүүлэгт оролцох чадамжийг нэмэгдүүлж, улмаар Монголын хувийн хэвшлийн байгууллагуудад олон улсын хөдөлмөрийн хэм хэмжээг хэрэгжүүлэх академик ойлголт олгох, үүнийг түгээн дэлгэрүүлэх болон байгууллагын чадавхийг бэхжүүлэхэд чухал дэмжлэг үзүүлэх ач холбогдолтой юм.