“ЦӨЛИЙН ДУУ ХООЛОЙ” ОЛОН УЛСЫН САНААЧИЛГА АЛБАН ЁСООР НЭЭГДЛЭЭ!
Монгол Улсын Ерөнхийлөгчийн ивээл дор хэрэгжиж буй “Цөлийн дуу хоолой” (Voice of the Desert) олон улсын санаачилгын нээлтийн ажиллагаа амжилттай зохион байгуулагдлаа.
Энэхүү арга хэмжээ нь Монгол Улсад болох НҮБ-ын Цөлжилттэй тэмцэх конвенцын Талуудын XVII бага хурал (UNCCD COP17)-ыг угтан, төслийн үзэл санаа, олон улсын ач холбогдлыг олон нийт, төрийн байгууллага, залуучуудад танилцуулах зорилготой юм.
Нээлтийн үеэр Монгол Улсын Ерөнхийлөгч У.Хүрэлсүхийн мэндчилгээ, илгээлтийг Байгаль орчин, ногоон хөгжлийн бодлогын зөвлөх Ж.Сандагсүрэн танилцуулж, тус санаачилгыг ивээлдээ аван хэрэгжүүлэхийн ач холбогдлыг онцоллоо.
Мөн нээлтэд МҮХАҮТ-ын Гүйцэтгэх захирал Ц.Магнайбаатар оролцон үг хэлэхдээ, тус аяныг дэмжин хамтран ажиллаж байгаадаа баяртай байгаагаа илэрхийлээд "Уг төсөл нь Монгол Улсаас эхлэлтэй ч бүс нутаг, улмаар дэлхий нийтийн анхааралд хүрч байж стратегийн ач холбогдолтой хамтын нөлөөлөл хийх санаачилга юм. Өнөөдөр хүн төрөлхтөн уур амьсгалын өөрчлөлт, цөлжилт, усны хомсдолын өмнө зогсож байна. Энэ бол зөвхөн байгаль орчны асуудал биш, эдийн засгийн тогтвортой байдал, улс орнуудын ирээдүйн өрсөлдөх чадвартай шууд холбоотой" гэдгийг онцлов.
Түүнчлэн "Цөлийн дуу хоолой" ТББ-ын Гүйцэтгэх захирал Н.Солонгоцацралт "Бид асуудал ярихгүй, шийдлүүдийг хооронд нь холбож ажиллаж байна. Цөлжилт, уур амьсгалын өөрчлөлтөд хил хязгаар гэж байхгүй тул шийдэл ч бас хил хязгааргүй байх ёстой. Манай экспедицийн маршрут бол Монголын 33 говиос эхэлж, Хятадын хуурай бүс, Төв Азийн тал хээрийг дайран Евразийн иргэдийг нэгтгэх 21-р зууны ногоон хамтын ажиллагааны шинэ тойрог юм" хэмээн төслийн алсын харааг танилцуулсан юм.
Үйл ажиллагааны үеэр морин хуурын аялгуу эгшиглэж, “33 говийн магтаал” бий биелгээний үзүүлбэрээр зочдын мэлмийг баясгасан бөгөөд Евразийн цөлжсөн бүс нутгаар гүйх экспедицийн баг тамирчид эх дэлхийдээ тангараг өргөн, аяллаа албан ёсоор эхлүүллээ
