МҮХАҮТ, ММЗИ хамтын ажиллагааны санамж бичиг байгууллаа
Монголын бизнесийн орчныг бэхжүүлэх, жижиг, дунд бизнес эрхлэгчдийн менежментийн чадавхыг нэмэгдүүлэх чиглэлд чухал алхам болж, Монголын Үндэсний Худалдаа, Аж Үйлдвэрийн Танхим болон Монголын Менежментийн Зөвлөхүүдийн Институт хамтын ажиллагааны санамж бичигт гарын үсэг зурлаа.
Санамж бичигт МҮХАҮТ-ын Гүйцэтгэх захирал Ц.Магнайбаатар, ММЗИ-ийн Гүйцэтгэх захирал Х.Номинсувд нар гарын үсэг зурсан бөгөөд хамтын ажиллагааны хүрээнд дотоодын бичил, жижиг, дунд бизнес эрхлэгчдийн менежментийн ур чадварыг системтэйгээр хөгжүүлэх, зөвлөх үйлчилгээний салбарын хөгжлийг дэмжих, олон улсын жишигт нийцсэн сургалт, хөтөлбөрүүдийг хамтран хэрэгжүүлэхээр зорьж байна.
Талуудын тохиролцооны дагуу ЖДБ эрхлэгчдэд зориулсан чанарын баталгаажуулалттай, сертификат олгох сургалтуудыг зохион байгуулахын зэрэгцээ менежментийн зөвлөх үйлчилгээний салбарын хууль эрх зүйн орчныг боловсронгуй болгох чиглэлээр төрийн байгууллагуудад хамтарсан санал, зөвлөмж хүргүүлэх юм.
Мөн МҮХАҮТ нь гишүүн байгууллагууддаа ММЗИ-ийн мэргэжлийн зөвлөх үйлчилгээ, төсөл хөтөлбөрүүдийг сурталчлан таниулахад дэмжлэг үзүүлэх бөгөөд талууд ойрын хоёр жилийн хугацаанд хамтарсан үйл ажиллагааны төлөвлөгөө боловсруулан хэрэгжүүлж, бизнесийн өрсөлдөх чадвар болон тогтвортой эдийн засгийн өсөлтийг дэмжихэд бодит хувь нэмэр оруулахаа илэрхийллээ.
Энэхүү хамтын ажиллагаа нь Монголын жижиг, дунд бизнесүүдийн удирдлагын чадавхыг шинэ түвшинд хүргэх, мэргэжлийн зөвлөх үйлчилгээний хүртээмжийг нэмэгдүүлэх, улмаар хувийн хэвшлийн тогтвортой хөгжлийг дэмжих чухал ач холбогдолтой гэж талууд онцоллоо.
