ХӨРӨНГИЙН ЗАХ ЗЭЭЛЭЭС САНХҮҮЖИЛТ ТАТАХ ОНЛАЙН СУРГАЛТЫГ ЗОХИОН БАЙГУУЛЛАА
Өнөөгийн хурдацтай өөрчлөгдөж буй бизнесийн орчинд компаниудын өсөлт, өргөжилтийг тодорхойлогч хамгийн гол хөдөлгүүр нь санхүүжилт байдаг. Тэгвэл дотоодын аж ахуйн нэгжүүд зөвхөн уламжлалт банкны зээлээр хязгаарлагдахгүйгээр, хөрөнгийн зах зээлээс IPO, бонд, хөрөнгөөр баталгаажсан үнэт цаас зэрэг олон төрлийн уян хатан эх үүсвэрийг татах боломж бүрэн нээлттэй болоод байна.
Үүнтэй холбогдуулан Монголын Үндэсний Худалдаа Аж Үйлдвэрийн Танхим (МҮХАҮТ) болон Монголын анхны хувийн бирж болох Улаанбаатар Үнэт Цаасны Бирж (UBX) хамтран танхимын гишүүн компаниуддаа зориулж “Хөрөнгийн зах зээлээс хөрөнгө оруулалт татах нь” сэдэвт онлайн сургалтыг амжилттай зохион байгууллаа.
Энэхүү сургалт нь компаниудад өөрийн байгууллагын онцлог, хэрэгцээнд тохирсон санхүүжилтийн оновчтой шийдлийг сонгоход нь практик зөвлөгөө өгөх, хөрөнгийн зах зээлийн давуу талуудыг таниулах үндсэн зорилготой байв.
Тус онлайн сургалтад хөрөнгийн зах зээлийн салбарт олон жилийн туршлагатай шилдэг мэргэжилтнүүд болон зочин илтгэгчид оролцож, оролцогчдод цогц мэдээллийг системтэйгээр хүргэсэн юм. Сургалтын эхэнд "Хөрөнгийн зах зээлийн суурь ойлголт" сэдвээр "Үнэт Секьюритис" ҮЦК-ийн Гүйцэтгэх захирал Э.Нямбаяр үндсэн ойлголтуудыг танилцуулсан бол, түүний дараагаар "Таван Богд Капитал" ҮЦК-ийн Дотоод зах зээл хариуцсан дэд захирал С.Түвшинзаяа "Хөрөнгө оруулалт татах стратеги ба бэлтгэл" сэдвээр компаниуд зах зээлд хөл тавихаас өмнө хэрхэн бэлтгэх, ямар тактик баримтлах талаар үнэтэй зөвлөмжүүдийг хуваалцлаа. Мөн үнэт цаас гаргах албан ёсны үйл явц, түүний эрх зүйн болон практик дарааллын талаар "Ти Ди Би Секьюритис" ҮЦК-ийн Хөрөнгө оруулалтын банкны газрын захирал Б.Золбоо нарийвчилсан мэдээлэл өгч, оролцогчдын сонирхсон асуултуудад мэргэжлийн хариулт өгсөн юм.
Сургалтын төгсгөлд хөрөнгийн зах зээлээс амжилттай санхүүжилт босгосон бодит жишээг хуваалцлаа. Энэхүү хэсэгт Монголын хамгийн анхны LED гэрлийн үйлдвэр, эрчим хүчний хэмнэлттэй технологи болон цахилгааны автоматжуулалтын чиглэлээр үйл ажиллагаа явуулдаг үндэсний үйлдвэрлэгч "Анд-Энерги" ХК-ийн ТУЗ-ийн дарга Т.Барс уригдан оролцсон юм.
Тус компани нь 2017 онд Улаанбаатар Үнэт цаасны биржийн хөгжлийн талбарт хувьцаагаа гаргаж байсан түүхтэй бөгөөд 2025 онд гэхэд хувьцаа эзэмшигчиддээ 93.6 сая төгрогийн ногдол ашиг хуваарилсан амжилттай жишээ юм. UBX-ийн Хөгжлийн талбар нь харьцангуй уян хатан, бага шалгуураар үнэт цаас гаргах боломжийг олгодог учраас дундаж аж ахуйн нэгжүүдэд маш том түлхэц болдгийг Т.Барс өөрийн илтгэлдээ онцолсон юм.
Зохион байгуулагчдын зүгээс нийт оролцогчдод талархал илэрхийлээд, үнэт цаас гаргахтай холбоотой нарийн мэдээлэл, зөвлөгөө авахыг хүсвэл info@ubx.mn хаягаар нээлттэй хандахыг урилаа.
