БОЛОВСРОЛЫН ЯАМ, МҮХАҮТ БОЛОН МТМБС-ИЙН КОНСОРЦИУМ МЭРГЭЖЛИЙН БОЛОВСРОЛЫГ ХӨГЖҮҮЛЭХЭД ХАМТРАН АЖИЛЛАНА
Боловсролын яам, Монгол Улсын Худалдаа, аж үйлдвэрийн танхим (МҮХАҮТ) болон Монголын техникийн болон мэргэжлийн боловсролын сургуулиудын консорциум хөдөлмөрийн зах зээлийн эрэлтэд нийцсэн мэргэжилтэй ажилтан бэлтгэх чиглэлээр хамтран ажиллах санамж бичиг байгууллаа.
Талууд Засгийн газрын “Шинэ сэргэлтийн бодлого” болон боловсролын салбарын шинэчлэлийг дэмжих, төр-хувийн хэвшлийн түншлэлийг бэхжүүлэхэд анхааран ажиллах бөгөөд үндэсний ур чадвартай мэргэжилтэй ажилтны эрэлт хэрэгцээ нэмэгдэж буй энэ үед бодлого, үйл ажиллагаагаа уялдуулан ажиллах юм.
Энэхүү түншлэлийн хүрээнд олон улсад хүлээн зөвшөөрөгдсөн «Хосмог сургалт»-ын хэлбэрийг үндэсний хэмжээнд нутагшуулах, эрх зүйн орчныг бүрдүүлэхэд Боловсролын яам болон МҮХАҮТ голлох үүрэг гүйцэтгэнэ. Мөн Германы олон улсын хамтын ажиллагааны нийгэмлэгийн (GIZ) “Түншлэлд суурилсан техникийн болон мэргэжлийн боловсрол, сургалт II” төслийн оролцоог хангах, Менежментийн хороо болон ажлын албыг байгуулахаар шийдвэрлэсэн байна. Монголын техникийн болон мэргэжлийн боловсролын сургуулиудын консорциум болон МҮХАҮТ-ын зүгээс насан туршийн суралцахуй, олон улсын ур чадвар, дижитал шилжилт, төр-хувийн хэвшлийн түншлэлийг дэмжсэн, хөдөлмөрийн зах зээлийн эрэлтэд нийцсэн ур чадварын тогтолцоог хөгжүүлэхэд голлон анхаарах юм.
Санамж бичгийг Боловсролын сайд Л.Энх-Амгалан, МҮХАҮТ-ын Гүйцэтгэх захирал Т.Магнайбаатар болон Консорциумын удирдлагууд үзэглэлээ.
