МҮХАҮТ ОЛОН УЛСЫН АЖИЛ ОЛГОГЧДЫН БАЙГУУЛЛАГА (IOE)-ТАЙ ХАМТЫН АЖИЛЛАГААГАА ИДЭВХЖҮҮЛНЭ
МҮХАҮТ-ын Ерөнхий нарийн бичгийн дарга Б.Саруул Олон улсын ажил олгогчдын байгууллага (IOE)-ын Ерөнхий нарийн бичгийн дарга Роберто Суарестэй албан ёсны уулзалт хийлээ. МҮХАҮТ нь дэлхийн хамгийн том ажил олгогчдын сүлжээ болох тус байгууллагад энэ оны 3 дугаар сард гишүүнээр элссэн бөгөөд энэ удаагийн уулзалтаар цаашдын хамтын ажиллагааны чиглэлээ хэлэлцэж, гишүүнчлэлийн гэрчилгээгээ албан ёсоор гардан авсан байна.
Энэхүү гишүүнчлэл нь Монголын бизнесийн дуу хоолойг олон улсын хөдөлмөр, эдийн засгийн бодлогын хэлэлцүүлэгт хүргэх шинэ боломжийг нээж, дотоодын аж ахуйн нэгжүүдэд дэлхийн шилдэг туршлага, бодлогын мэдээлэл, олон улсын түншлэлд нэвтрэх өргөн үүдийг нээж байгаа юм.
Талууд цаашдын түншлэлээ идэвхжүүлэх талаар дэлгэрэнгүй ярилцсаны зэрэгцээ энэ жилийн Олон улсын хөдөлмөрийн бага хурал (ILC)-ын үеэр МҮХАҮТ-аас Жендэрийн хороо болон Платформ эдийн засгийн хорооны хэлэлцүүлгүүдэд идэвхтэй оролцож, ялангуяа Жендэрийн хорооны хуралдаанд Монгол Улсын сайн туршлагаас хуваалцсаныг онцлон тэмдэглэв.
Өнөөгийн өрсөлдөөнт орчинд бизнесийн хөгжил, бүтээмжийг нэмэгдүүлэх нь амжилтын гол хөдөлгүүр болж байна. Компаниуд инновац, ур чадварын хөгжил, менежментийн шинэ арга барилыг үйл ажиллагаандаа нэвтрүүлснээр илүү өндөр нэмүү өртөг бий болгож, олон улсын зах зээлд өрсөлдөх чадвараа бэхжүүлэх шаардлагатай байгаа юм.
Ялангуяа хиймэл оюун ухаан (AI) болон дижитал шилжилт нь бизнесийн үйл ажиллагааг илүү хурдан, ухаалаг, өгөгдөлд суурилсан болгох замаар зардлыг бууруулж, бүтээмжийг өсгөхөөс гадина харилцагчийн туршлагыг сайжруулж, шинэ боломжуудыг нээж байна.
Үүний зэрэгцээ ногоон шилжилт, эрчим хүчний хэмнэлт, тогтвортой үйлдвэрлэл болон ESG зарчмуудыг хэрэгжүүлэх нь зөвхөн байгаль орчны хариуцлага төдийгүй Монголын бизнесүүд олон улсын хөрөнгө оруулалт татах, экспортын зах зээлд нэвтрэх өрсөлдөх чадварын суурь шаардлага болоод байна.
Иймд МҮХАҮТ болон Олон улсын ажил олгогчдын байгууллага (IOE) хамтран Монголын бизнес эрхлэгчдийг бүтээмж, инновац, дижитал болон ногоон шилжилтийн чиглэлээр тууштай чадавхжуулж, тогтвортой өсөлтөд хүрэхэд нь иж бүрэн дэмжлэг үзүүлж ажиллахаар тохиролцлоо.
