МҮХАҮТ-ЫН ДЭРГЭДЭХ НООС, НООЛУУРЫН ЗӨВЛӨЛИЙН ЭЭЛЖИТ ХУРАЛ БОЛЛОО
МҮХАҮТ-ын дэргэдэх Ноос, ноолуурын зөвлөлийн ээлжит хурал өнөөдөр болж, тус зөвлөлийн шинэ даргаар "Монгол Кашмер" ХХК-ийн үүсгэн байгуулагч, "Mongolian Eco Textile Export Cluster" ТББ-ын тэргүүн Э.Эрхэмхүүг сонголоо.
Тэрээр ноос, ноолуурын салбарт 11 дэх жилдээ ажиллаж байгаа бөгөөд салбарын хөгжил, экспортын өрсөлдөх чадварыг нэмэгдүүлэх чиглэлээр идэвхтэй ажиллаж ирсэн туршлагатай юм. Хурлаар зөвлөлийн үйл ажиллагааны цаашдын чиглэл, хэрэгжүүлэх зорилт, арга хэмжээний талаар нарийвчлан хэлэлцэв.
Үүний зэрэгцээ, 2021 оноос хойш тус зөвлөлийг амжилттай удирдаж, салбарын эрх ашиг, хамтын ажиллагааг бэхжүүлэх үйлсэд үнэтэй хувь нэмэр оруулсан "Гоёл Кашмер" ХХК-ийн захирал, Аж үйлдвэрийн гавьяат ажилтан Б.Ариунаад хуралд оролцогчид гүн талархал илэрхийлсэн юм.
Хурлын үеэр МҮХАҮТ-ын Гүйцэтгэх захирал Ц.Магнайбаатар ноос, ноолуурын салбар нь Монгол Улсын уул уурхайн бус экспортын голлох багана гэдгийг онцолж, салбарын өрсөлдөх чадварыг дээшлүүлж, хамтын ажиллагаа болон бодлогын дэмжлэгийг улам бэхжүүлэх шаардлагатай байгааг тэмдэглээд, нэмүү өртөг шингэсэн үйлдвэрлэлийг хөгжүүлэх нь улс орны эдийн засагт өндөр ач холбогдолтойг анхаарууллаа.
МҮХАҮТ-ын дэргэдэх зөвлөлүүд нь тухайн салбарын бизнес, эдийн засаг, хууль эрх зүйн орчныг сайжруулах, төрөөс хэрэгжүүлж буй бодлого, шийдвэрт хувийн хэвшлийн дуу хоолойг хүргэх, бодлогын өмгөөлөл хийх, төр-хувийн хэвшлийн хамтын ажиллагааг хөгжүүлэх, гишүүд хоорондын уялдаа холбоог бэхжүүлэх, мэдээллээр хангах чиг үүрэгтэйгээр ажилладаг юм.
Өдгөө танхимын дэргэд 18 салбар зөвлөл үйл ажиллагаа явуулж байгаагийн нэг нь 2003 онд байгуулагдсан Ноос, ноолуурын зөвлөл бөгөөд тус зөвлөл нь салбарын тулгамдсан асуудлыг хэлэлцэх, боломжит шийдлийг тодорхойлох, төрийн байгууллагуудад санал хүргүүлэх, салбарын эрх ашгийг хамгаалах чиглэлээр тогтмол үйл ажиллагаа явуулж байна.
Хурлын төгсгөлд оролцогчид шинээр сонгогдсон зөвлөлийн дарга Э.Эрхэмхүүд баяр хүргэж, салбарын аж ахуйн нэгжүүдийн хамтын ажиллагааг бэхжүүлэх, төр-хувийн хэвшлийн түншлэлийг өргөжүүлэх, ноос, ноолуурын салбарын өрсөлдөх чадвар, экспортыг нэмэгдүүлэх чиглэлээр амжилттай ажиллахыг хүсэн, цаашдын ажил үйлсэд нь өндөр амжилт хүсэв.
