МҮХАҮТ-ЫН ЕРӨНХИЙ НАРИЙН БИЧГИЙН ДАРГА Б.САРУУЛ ДЭЛХИЙН ХУДАЛДААНЫ БАЙГУУЛЛАГЫН ХУРАЛДААНД ОРОЛЦОВ
МҮХАҮТ-ын Ерөнхий нарийн бичгийн дарга Б.Саруул Швейцарын Холбооны Улсын Женев хотод ажиллах үеэрээ Дэлхийн худалдааны байгууллага (WTO)-ын "Худалдаа болон жендэрийн албан бус бүлэг"-ийн хуралдаанд оролцлоо.
Тэрээр уулзалтын үеэр цахим эдийн засаг дахь эмэгтэй экспортлогчдыг дэмжих “WEIDE” сангийн Монгол Улс дахь хэрэгжилт, "SheTrades Mongolia Hub"-ийн үйл ажиллагааны үр дүн болон МҮХАҮТ-аас эмэгтэй бизнес эрхлэгчдийг дэмжих чиглэлээр хэрэгжүүлж буй төсөл, хөтөлбөрүүдийг танилцуулж, цаашид хамтарсан төслүүд хэрэгжүүлэхээр тохиролцов.
МҮХАҮТ нь Дэлхийн Худалдааны Байгууллага болон Олон Улсын Худалдааны Төв (ITC)-тэй хамтран эмэгтэй экспортлогчдыг цахим худалдаа, дижитал шилжилт, татварын мэдлэг, санхүүгийн чадавх, зах зээлийн тэлэлтийн чиглэлээр системтэйгээр дэмжих, олон улсын зах зээл дэх тэдний оролцоог нэмэгдүүлэх зорилгоор “WEIDE” сангийн төслийг хэрэгжүүлж байгаа юм. Өдгөө тус төсөлд нийт 45 эмэгтэй бизнес эрхлэгч хамрагдаж, сангийн буцалтгүй тусламжийг хүртээд байна.
Мөн МҮХАҮТ болон Женевт төвтэй Олон улсын худалдааны төв (ОУХТ)-ийн хооронд байгуулсан “SheTrades hub Mongolia” санаачилгыг хэрэгжүүлэх хугацааг сунгах тухай Хамтын ажиллагааны санамж бичигт гарын үсэг зурах ёслолын ажиллагаа болов. Санамж бичигт МҮХАҮТ-ын Ерөнхий нарийн бичгийн дарга Б.Саруул, ОУХТ-ийн Гүйцэтгэх захирал Памела Күүк Хамильтон нар гарын үсэг зурж, хамтын ажиллагааны талаар дэлгэрэнгүй санал солилцлоо.
Тус ёслолд Монгол Улсаас НҮБ-ын Женев дэх төв болон олон улсын бусад байгууллагын дэргэд суугаа Байнгын төлөөлөгч, Элчин сайд Д.Гэрэлмаа оролцож, энэхүү хамтын ажиллагааны үр дүнд манай улсын жижиг, дунд бизнес эрхлэгч эмэгтэйчүүдийн гадаад худалдаан дахь оролцоо, эдийн засгийн үр өгөөж үлэмж нэмэгдэнэ гэдэгт итгэлтэй байгаагаа илэрхийлэв. Талууд цаашид эмэгтэй бизнес эрхлэгчдийг дэмжих хамтарсан төсөл, хөтөлбөрүүдийг идэвхтэй үргэлжлүүлэн хэрэгжүүлэхээр тохиролцсон байна.
