ОЛОН УЛСЫН ХӨДӨЛМӨРИЙН 114 ДҮГЭЭР БАГА ХУРАЛ ЖЕНЕВ ХОТНОО ЭХЭЛЛЭЭ

Швейцарын Холбооны Улсын Женев хотноо Олон улсын хөдөлмөрийн байгууллагын (ОУХБ) 114 дүгээр бага хурал /2026.06.01/ албан ёсоор эхэллээ. Энэ сарын 12-ныг хүртэл үргэлжлэх тус чуулганд ОУХБ-ын гишүүн 187 улсын Засгийн газар, ажил олгогч болон ажилтны төлөөллүүд хуран цугларч, дэлхийн хөдөлмөрийн зах зээлийн ирээдүйн бодлогыг тодорхойлж байна. Жил бүр уламжлал болгон зохион байгуулагддаг тус бага хурал нь олон улсын хөдөлмөрийн стандартыг боловсруулах, хөдөлмөр эрхлэлт, нийгмийн хамгааллыг сайжруулах, хөдөлмөрийн харилцааг зохицуулах дэлхийн хэмжээний хамгийн өндөр түвшний гурван талт механизм юм.

Энэ удаагийн хуралдаанаар дижитал шилжилт, платформ эдийн засаг дахь зохистой хөдөлмөр болон ажиллагсдын эрх, нийгмийн баталгааг хангах асуудлыг голчлон хэлэлцэж байна. Мөн ажлын байр дахь жендэрийн тэгш байдлыг ахиулах, нийгмийн яриа хэлэлцээ болон гурван талт хамтын ажиллагааг бэхжүүлэх, хөдөлмөрийн олон улсын хэм хэмжээний хэрэгжилтэд хяналт тавих зэрэг тулгамдсан сэдвүүд анхаарлын төвд байна. Оролцогч талууд эдгээр сорилтуудын хүрээнд санал солилцож, хөдөлмөрийн зах зээлийн ирээдүйн чиг хандлагыг тодорхойлох олон улсын бодлогын баримт бичиг, зөвлөмжүүдийг хэлэлцэн батлах юм.

Хурлын үйл ажиллагаанд манай улсаас Гэр бүл, хөдөлмөр, нийгмийн хамгааллын яамны төлөөлөгчид, Монголын Үйлдвэрчний эвлэлийн холбооны Ерөнхийлөгч Э.Тамир, ажил олгогчдыг төлөөлөн Монголын ажил олгогч эздийн нэгдсэн холбооны дэд Ерөнхийлөгч Ч.Нанжидсамбуу, Монголын Үндэсний Худалдаа Аж Үйлдвэрийн Танхимын Ерөнхий нарийн бичгийн дарга Б.Саруул, Монгол Улсаас НҮБ-ын Женев дэх салбар болон олон улсын байгууллагуудын дэргэд суугаа Байнгын төлөөлөгч, Элчин сайд Г.Гэрэлмаа нар оролцож байна.