ХОСМОГ СУРГАЛТЫН ТОГТОЛЦООГ ОЛОН УЛСЫН ЖИШГЭЭР ЧАДАВХЖУУЛЖ БАЙНА
Монгол Улсын хөдөлмөрийн зах зээлд хамгийн эрэлттэй байгаа мэргэжилтэй ажилтнуудыг бэлтгэхэд "Хосмог сургалт" буюу онол, практикийг хослуулсан систем хамгийн үр дүнтэйгээр нэрлэгддэг. Тэгвэл энэхүү тогтолцоог Монголд улам нутагшуулж, чанарыг нь олон улсын түвшинд хүргэх сургалт, семинар амжилттай болж өндөрлөлөө.
МҮХАҮТ-ын Хосмог сургалтын нэгж болон cTVET 2 төслийн хамтын ажиллагааны хүрээнд олон улсын нэртэй зөвлөх, доктор Винфрид Хойзингерийг гэрээлэн ажиллуулж байгаа билээ. Түүний Монгол дахь ажлын гол цөм нь сургуулийн дэргэдэх Мэргэжлийн зөвлөлүүдийг чадавхжуулах, хувийн хэвшил болон танхимыг бие даан тогтвортой ажиллахад нь арга зүйн дэмжлэг үзүүлэхэд чиглэж байна.
Энэхүү ажлын хүрээнд доктор В.Хойзингер энэ сарын 28, 29-ний өдрүүдэд Техникийн болон мэргэжлийн боловсролын сургуулиудын дэргэдэх Мэргэжлийн зөвлөлүүдийг чадавхжуулах тусгайлсан сургалтыг зохион байгууллаа. Олон улсын зөвлөхийн гол онцлог нь бэлэн загвар, онолын материал тулгахаас илүүтэй оролцогчдыг яг практик дээр өөрсдөө бүтээгдэхүүн, шийдлээ боловсруулах үйл явцад татан оролцуулж, "гардан сургадаг" давуу талтай юм.
Хоёр өдөр үргэлжилсэн тус семинарт МҮХАҮТ-ын төлөөллүүдээс гадна Хөвсгөлийн Ойн мэргэжлийн зөвлөл, Зүүнхараа Политехник коллеж, Дархан, Налайх, Өмнөговь аймгийн Уул уурхай, барилга, цахилгааны чиглэлийн Мэргэжлийн зөвлөлүүд болон Инженерүүдийн холбооны нийт 35 төлөөлөгч идэвхтэй хамрагдаж, туршлага судаллаа.
