УРИАЛГА
Монголын Үндэсний Худалдаа, Аж Үйлдвэрийн Танхимын /МҮХАҮТ/ дэргэдэх Бизнес эрхлэгч эмэгтэйчүүдийн зөвлөлөөс Европын Холбооны санхүүжилтээр хэрэгжиж буй “Монгол улсад гадаад худалдааг хөгжүүлэх” төслийн дэмжлэгтэйгээр “Төвийн бүсийн бизнес эрхлэгч эмэгтэйчүүдийн чуулган”-ыг 2026 оны 5 дугаар сарын 22-ны өдөр Дархан хотод амжилттай зохион байгууллаа. Бизнес эрхлэгч эмэгтэйчүүд улс орны хөгжил, хойч үеийнхээ сайн сайхны төлөө эрхэлж буй ажилдаа хариуцлагатай хандаж, хөрөнгө оруулалтын боломжуудыг нийгмийн эерэг өөрчлөлтөд чиглүүлэхийг зорьдог утгаараа энэхүү чуулган нь цаг үеэ олсон, өндөр ач холбогдолтой үйл ажиллагаа болсон гэж дүгнэж байна.
Монгол Улс хүмүүнлэг, ардчилсан нийгмийг байгуулах, даяаршилтай хөл нийлүүлэн алхах замаар НҮБ-ын Тогтвортой хөгжлийн зорилтуудад нэгдсэн билээ. Энэхүү дэлхий нийтийн санаачилгын хүрээнд бизнес эрхлэгчид төр, төрийн бус байгууллагуудтай хамтран ажиллаж, судалгаа шинжилгээнд үндэслэн байгаль орчинд ээлтэй, хариуцлагатай хэрэглээг дэмжсэн, жендэрийн мэдрэмжтэй стратегиар бизнесээ өргөжүүлэх талаар тусгайлан хэлэлцэв.
Монгол улсын Засгийн газраас дэвшүүлсэн эдийн засгийг тэлэх, бизнесийн орчныг сайжруулах, бүсчилсэн хөгжлийг дэмжих бодлогыг бид дэмжиж, Засгийн газраас өргөн санаачлан хэлэлцүүлж буй Татварын багц хуулийн шинэчлэл болон бизнесийн бусад хуулийн шинэчлэлд дуу хоолойгоо өргөн идэвхтэй оролцож байгааг оролцогчид тэмдэглээд энэ чиглэлийн үйл ажиллагааг идэвхжүүлэх шаардлагатай байгааг хүлээн зөвшөөрөв.
Чуулганд оролцогчдын гаргасан нийтлэг санал санаачилгыг үндэслэн МҮХАҮТ болон Төвийн бүсийн Бизнес эрхлэгч эмэгтэйчүүдийн зөвлөлүүд хамтран дараах асуудлуудыг онцгойлон анхаарч, шийдвэрлэх арга хэмжээ авахыг Монгол Улсын Их Хурал, Засгийн газар болон бизнесийн салбарын шийдвэр гаргагчдад хандан уриалж байна. Үүнд:
- Татварын орчныг тэгш, шударга, тэнцвэртэй, бизнесийн байгууллагын тогтвортой өсөлтийг хангахуйц байдлаар сайжруулах;
- Эдийн засгийн чөлөөт худалдааны гэрээ хэлэлцээрүүдийн үр дүнд дүн шинжилгээ хийж, импортын татварын зохицуулалтаар дотоодын үйлдвэрлэгчдийг бодитоор дэмжих;
- Бүсчилсэн хөгжлийн бодлогын хүрээнд нийслэл болон төв суурин газраас алслагдмал бүс нутагт бизнес эрхлэгчдийн татвар, хураамж, шимтгэлийг бууруулж, санхүүгийн бодит дэмжлэг үзүүлэх;
- "Эмэгтэй бизнес эрхлэгч"-ийн нэгдсэн тодорхойлолтыг хуульчлах, “Аж ахуй эрхлэгч эмэгтэйчүүдийн эдийн засгийн оролцоог нэмэгдүүлэх тухай” хуулийн төслийг батлах, эмэгтэйчүүдийн бизнес эрхлэлтийг дэмжсэн дэд бүтэц, сургууль, цэцэрлэг, яслийн хангамжийг нэмэгдүүлэх;
- Тогтвортой хөгжлийн шалгуур үзүүлэлтүүдийг улс орны хэмжээнд бодитой, бүрэн тодорхойлж, гарч буй өөрчлөлтийг хэмжин, хариу арга хэмжээ авах тогтолцоог бүрдүүлэх;
- Кластерын тогтолцоог хөгжүүлэх, нэвтрүүлэх замаар бизнес эрхлэгч эмэгтэйчүүдийн үр дүнтэй хамтын ажиллагааг бий болгох.
Энэхүү уриалгыг ажил хэрэг болгох чиглэлээр талууд идэвх санаачилга гаргана гэдэгт чуулганы оролцогчид итгэл дүүрэн байгаа бөгөөд энэхүү үйлст өөрсдийн хувь нэмрээ оруулан, манлайлал үзүүлэхээ илэрхийлж байна.
ТӨВИЙН БҮСИЙН БИЗНЕС ЭРХЛЭГЧ ЭМЭГТЭЙЧҮҮДИЙН ЧУУЛГАНД ОРОЛЦОГЧИД
2026 оны 5 дугаар сарын 22 Дархан хот
