"ENVEX 2026" ОЛОН УЛСЫН БАЙГАЛЬ ОРЧНЫ ТЕХНОЛОГИ, СЭРГЭЭГДЭХ ЭРЧИМ ХҮЧНИЙ ҮЗЭСГЭЛЭН АМЖИЛТТАЙ ЗОХИОН БАЙГУУЛАГДЛАА
Олон улсын байгаль орчны технологи болон сэргээгдэх эрчим хүчний "ENVEX 2026" үзэсгэлэн 2026 оны 5 дугаар сарын 20-ноос 22-ны өдрүүдэд БНСУ-ын Сөүл хотноо зохион байгуулагдлаа. Энэ удаагийн арга хэмжээнд дэлхийн 26 орны 316 компанийн 655 павильон оролцож, байгаль орчин, ус цэвэршүүлэлт, орчны бохирдлыг бууруулах, нүүрсхүчлийн хийн ялгарлыг багасгах технологиуд, хиймэл оюун ухаанд (AI) суурилсан ногоон технологи, CCUS (Нүүрстөрөгчийг барих, ашиглах, хадгалах) болон дулааныг нөхөн сэргээх дулаан солилцооны систем зэрэг дэвшилтэт шийдлүүдийг танилцуулав.
Манай улсаас Байгаль орчин, уур амьсгалын өөрчлөлтийн яам, Нийслэлийн байгаль орчны газар болон уул уурхай, барилгын салбарын бизнес эрхлэгчдийн төлөөлөл бүхий 12 хүний бүрэлдэхүүнтэй баг тус үзэсгэлэнд оролцлоо.
Монголын төлөөлөгчид хоёр орны байгууллагуудын "1:1" ганцаарчилсан уулзалт болон B2B салбар хоорондын хэлэлцүүлэгт оролцож, Монгол Улсын байгаль орчны өнөөгийн нөхцөл байдал, тулгамдаж буй асуудлуудыг танилцуулсан юм.
Түүнчлэн БНСУ-ын K-water, POSCO, UNIDO зэрэг томоохон байгууллагуудтай хийсэн уулзалтууд үр дүнтэй болж, байгальд ээлтэй ногоон технологийг нутагшуулах, гадаад зах зээлийн хөрөнгө оруулалтыг татах, бизнесийн хамтын ажиллагааг өргөжүүлэх чиглэлээр санал солилцлоо.
Арга хэмжээний үеэр төлөөлөгчид БНСУ-ын Кёнги мужид байрлах "Hanam Union Park" эко цогцолборын үйл ажиллагаатай танилцав.
Тус байгууламж нь хог хаягдал болон бохир ус цэвэрлэх системийг бүхэлд нь газар доор байрлуулж, газрын дээрх хэсгийг ногоон байгууламж, амралт зугаалгын бүс болгон тохижуулсан байгаль орчинд ээлтэй дэд бүтцийн шилдэг шийдэл юм.
