МОНГОЛЫН БИЗНЕСИЙН ТӨЛӨӨЛӨГЧИД ВЭЙНАНЬ ХОТЫН ХӨРӨНГӨ ОРУУЛАЛТ, ҮЙЛДВЭРЛЭЛИЙН ОРЧИНТОЙ ТАНИЛЦЛАА
МҮХАҮТ-ын Гүйцэтгэх захирал Ц.Магнайбаатар тэргүүтэй Монголын бизнесийн төлөөлөгчид БНХАУ-ын Шэньси мужийн Вэйнань хотын хөрөнгө оруулалт болон үйлдвэрлэлийн орчинтой биечлэн танилцлаа.
Уулзалтын үеэр манай төлөөлөгчид Вэйнань хотын аж үйлдвэрийн парк, үйлдвэрлэлийн бааз болон тэргүүлэгч үйлдвэрүүдийн үйл ажиллагааг газар дээр нь үзэж сонирхон, тус бүс нутгийн аж үйлдвэрийн хөгжил, тээврийн дэд бүтэц, бизнесийн орчны талаар дэлгэрэнгүй мэдээлэл авсан юм.
Мөн орчин үеийн хөдөө аж ахуй, тоног төхөөрөмжийн үйлдвэрлэл, ложистик болон хил дамнасан худалдааны чиглэлээр үйл ажиллагаа явуулдаг аж ахуйн нэгжүүдтэй уулзалт хийж, цаашдын хамтын ажиллагааны боломжуудыг нарийвчлан хэлэлцэв.
Энэхүү уулзалтын хүрээнд үйлдвэрлэлийн танилцуулга, бизнес уулзалтууд болон газар дээрх танилцах аяллууд ар араасаа зохион байгуулагдсан бөгөөд оролцогч талууд бодит төсөл, хөрөнгө оруулалтын хамтын ажиллагааны талаар ажил хэрэгч яриа хэлэлцээ өрнүүлж чадсан байна.
Энэхүү уулзалт нь Монгол Улс болон Шэньси муж хоорондын эдийн засаг, худалдааны харилцааг шинэ шатанд гаргаж, хоёр талын бизнес эрхлэгчид шууд түншлэл тогтоох, харилцан ашигтай ажиллах практик боломжийг бүрдүүлж байгаагаараа онцлог юм.
