МОНГОЛЫН БИЗНЕСИЙН ТӨЛӨӨЛӨГЧИД БНХАУ-ЫН СИ АНЬ ХОТНОО ЗОХИОН БАЙГУУЛАГДСАН "ТОРГОНЫ ЗАМЫН ЭКСПО"-Д ОРОЛЦЛОО
БНХАУ-ын Шэньси мужийн Си Ань хотноо энэ оны 5 дугаар сарын 21-нээс 25-ны өдрүүдэд 10 дахь удаагийн “Торгоны замын экспо” амжилттай зохион байгуулагдлаа. Тус олон улсын арга хэмжээнд Монгол, АНУ, Канад, Герман, Унгар, Нидерланд, Сингапур, БНСУ, Малайз зэрэг дэлхийн 39 улс болон бүс нутгийн худалдаа, хөрөнгө оруулалтын байгууллага, аж ахуйн нэгжийн төлөөлөгчид өргөнөөр оролцсон байна.
Үзэсгэлэнгийн хүрээнд зохион байгуулагдсан “2026 Олон улсын худалдаа, аж үйлдвэрийн танхимуудын (Сиань) хамтын ажиллагааны уулзалт”-д 300 гаруй төлөөлөгч чуулж, эдийн засаг, худалдааны шинэ боломжуудын талаар санал солилцсон юм.
Тус арга хэмжээнд МҮХАҮТ-ын Гүйцэтгэх захирал Ц.Магнайбаатар тэргүүтэй Монголын бизнесийн төлөөлөгчид оролцож, олон улсын худалдаа, хөрөнгө оруулалтын түншлэлийг өргөжүүлэх чиглэлээр хэд хэдэн ажил хэрэгч уулзалтуудыг хийлээ.
Түүнчлэн “Олон улсын бизнесийн хамтын ажиллагааг гүнзгийрүүлж, Торгоны замын хөгжлийн боломжийг хамтран хуваалцах нь” сэдэвт хэлэлцүүлгийн үеэр оролцогчид улс орнуудын худалдаа, хөрөнгө оруулалтын бодлого, зах зээлийн өнөөгийн нөхцөл байдал болон цаашдын хэрэгцээ шаардлагын талаар мэдээлэл солилцсон байна. Энэхүү арга хэмжээний үеэр Шэньси мужийн Олон Улсын Худалдааг Дэмжих Хороо болон МҮХАҮТ хамтран ажиллах санамж бичигт гарын үсэг зурсан бөгөөд талууд хоёр улсын аж ахуйн нэгжүүдийн хамтын ажиллагаа, хөрөнгө оруулалт болон үзэсгэлэн яармагийн хамтын ажиллагааг шинэ шатанд гаргахад хамтран ажиллах юм.
Мөн үзэсгэлэнгийн үеэр шинэ эрчим хүч, тоног төхөөрөмжийн үйлдвэрлэл, орчин үеийн хөдөө аж ахуй, тээвэр логистикийн чиглэлээр төрөлжсөн салбар уулзалтууд болж, Монголын төлөөлөгчид олон улсын компаниудтай ганцаарчилсан (B2B) уулзалт хийж, практик хамтын ажиллагааны боломжуудаа хэлэлцсэн нь Монгол Улс болон Шэньси муж хоорондын эдийн засгийн түншлэлийг бэхжүүлж, бизнес эрхлэгчдийн харилцааг өргөжүүлэхэд дөхөм боллоо.
