ХЭНТИЙ АЙМАГ ДАХЬ САЛБАР ТАНХИМЫН ДАРГААР Д.БАТБОЛДЫГ УЛИРУУЛАН СОНГОЛОО

Монголын Үндэсний Худалдаа Аж Үйлдвэрийн Танхимын Хэнтий аймаг дахь салбар танхимын "Бүх гишүүдийн хурал" өнөөдөр боллоо.

Хуралд МҮХАҮТ-ын Дэд захирал Ч.Баттулга бүсийн бизнесийн орчныг сайжруулах талаар үг хэллээ.

Хуралдаанаар салбар танхимын сүүлийн 4 жилийн үйл ажиллагаа, санхүүгийн тайланг дүгнэж, Тэргүүлэгчид болон Хяналтын зөвлөлийн бүрэлдэхүүнийг шинэчлэн сонголоо. Улмаар салбар танхимын даргад нэр дэвшигчдийг танилцуулж, санал хураалт явуулснаар одоогийн дарга Д.Батболдыг гишүүдийн олонхын саналаар үүрэгт ажилд нь дахин улируулан сонгов.

Хурлын төгсгөлд аймаг, сумын удирдлагуудтай хэлэлцүүлэг өрнүүлж, цаашид орон нутгийн бизнес эрхлэгчдийг дэмжих, тэдний хамтын ажиллагааг өргөжүүлэхэд анхаарч ажиллахаар боллоо.