ТӨВИЙН БҮСИЙН БИЗНЕС ЭРХЛЭГЧ ЭМЭГТЭЙЧҮҮДИЙН ФОРУМ – 2026 ДАРХАН ХОТНОО АМЖИЛТТАЙ БОЛЖ ӨНДӨРЛӨЛӨӨ
МҮХАҮТ, Танхимын дэргэдэх Бизнес эрхлэгч эмэгтэйчүүдийн зөвлөл болон Европын Холбооны санхүүжилтээр хэрэгжиж буй “Монголын олон улсын худалдааг дэмжих” (ITDM) төсөл хамтран зохион байгуулсан “Төвийн бүсийн бизнес эрхлэгч эмэгтэйчүүдийн форум – 2026” арга хэмжээ Дархан хотноо амжилттай болж өндөрлөлөө.
Тус форумд Дархан-Уул, Орхон, Сэлэнгэ аймгийн бизнес эрхлэгч 90 гаруй эмэгтэй төлөөлөгч хүрэлцэн ирж, бүс нутгийн хамтын ажиллагааг өргөжүүлэх, бизнесийн өрсөлдөх чадвараа нэмэгдүүлэх, манлайлал болон дижитал ур чадвараа хөгжүүлэх чиглэлээр санал солилцон салбар бүрийн шийдвэр гаргагчид, энтрепренерууд болон технологийн түүчээлэгчдийг нэгтгэж, ирээдүйн хөгжлийн шинэ зураглалыг хамтдаа гаргахаар чуулсан юм.
Арга хэмжээний нээлтэд МҮХАҮТ-ын Ерөнхий нарийн бичгийн дарга Б.Саруул, БЭЭЗ-ийн дарга, Жүр Үр ХХК-ийн Гүйцэтгэх захирал Б.Мөнхзул болон төр, хувийн хэвшил, олон улсын байгууллагын төлөөллүүд оролцлоо.
Мөн Социал Демократ Монголын Эмэгтэйчүүдийн Холбооны Ерөнхийлөгч, УИХ-ын гишүүн Д.Үүрийнтуяаг төлөөлөн СДМЭХ-ны төвийн бүс хариуцсан нарийн бичгийн дарга А.Отгонжаргал оролцлоо.
Тэрээр “Эмэгтэйчүүдийн бизнес эрхлэлт бол зөвхөн өрхийн орлогыг нэмэгдүүлэх бус, бүс нутгийн хөгжил, ажлын байр, тогтвортой эдийн засгийн өсөлтийг дэмжих чухал хүчин зүйл” хэмээн онцлов.
Форумын хэлэлцүүлгийн гол асуудал нь эмэгтэйчүүдийн манлайлал, бизнес ба жендэрийн орчин, олон улсын худалдааны боломж, хиймэл оюуны хэрэглээ болон дижитал шилжилт, инновац зэрэг орчин үеийн бизнесийн экосистемийн тулгамдсан сэдвүүд байсан бөгөөд экспертүүд илтгэл хэлэлцүүлж, оролцогчид харилцан туршлага солилцон, шинэ түншлэл бий болгох боломжийг бүрдүүлсэн юм.
Түүнчлэн форумын төгсгөлд оролцогчид шийдвэр гаргагчдад хандан уриалга гаргаж, эмэгтэй бизнес эрхлэгчдийн хөгжлийг дэмжих эрх зүйн орчныг боловсронгуй болгох шаардлагатайг онцлон хэд хэдэн чухал саналыг дэвшүүллээ.
Тухайлбал, эмэгтэй бизнес эрхлэгчдийг татвар болон нийгмийн даатгалын бодлогоор дэмжих эрх зүйн зохицуулалтыг бий болгох, “Эмэгтэй бизнес эрхлэгч” гэсэн ойлголт, тодорхойлолтыг хууль, бодлогын баримт бичгийн түвшинд албан ёсоор томьёолох, аж ахуй эрхлэгч эмэгтэйчүүдийн эдийн засгийн оролцоо, санхүүгийн хүртээмж, бизнесийн өсөлтийг дэмжих эрх зүйн орчныг бүрдүүлэх, улмаар эмэгтэйчүүдийн эдийн засгийн оролцоог нэмэгдүүлэхэд чиглэсэн хуулийн төслийг боловсруулан Улсын Их Хуралд өргөн барих зэрэг санал, зөвлөмжийг уриалгадаа тусгасан байна.
Төвийн бүсийн бизнес эрхлэгч эмэгтэйчүүдийг нэгтгэсэн энэхүү форум нь тэдний эдийн засгийн манлайллыг бэхжүүлэх, бүс нутгийн хамтын ажиллагааг өргөжүүлэх, тогтвортой хөгжлийг дэмжих бодит шийдэл, санал санаачилгыг дэвшүүлсэн өндөр ач холбогдолтой арга хэмжээ боллоо.
