“ISO/IEC 17025:2017 – ЛАБОРАТОРИЙН МЕНЕЖМЕНТИЙН ТОГТОЛЦОО” АНХАН ШАТНЫ СУРГАЛТ БОЛЛОО
Монгол Улсад үйл ажиллагаа явуулж буй төр, хувийн хэвшлийн лабораториудын чадавхыг бэхжүүлэх, шинжилгээний үр дүнгийн найдвартай байдлыг олон улсын түвшинд хүргэх шаардлага цаг үеийн захиалга болоод байна. Үүнтэй холбоотойгоор МҮХАҮТ-ын дэргэдэх Бизнес академиас зохион байгуулдаг “ISO/IEC 17025:2017 – Лабораторийн менежментийн тогтолцоо” сэдэвт анхан шатны сургалт энэ сарын 21, 22-ны өдрүүдэд дөрөв дэх удаагаа амжилттай зохион байгуулагдлаа.
Энэ удаагийн сургалтад нийт 13 мэргэжилтэн хамрагдсан бөгөөд хоёр өдрийн турш үргэлжилсэн тус сургалтыг салбартаа танигдсан туршлагатай сургагч багш Х.Жаргал Д.Хишигжаргал, М.Должинсүрэн, Б.Болортуяа нар удирдан явуулж, онол болон практик хосолсон арга зүйгээр оролцогчдод мэдлэг олгосон юм.
Сүүлийн жилүүдэд манай улсад олон улсын жишигт нийцсэн, итгэмжлэгдсэн лабораториудын тоо нэмэгдэж байгаа бөгөөд үүнийг дагаад шинжилгээ, туршилтын үр дүнд тавигдах хяналт, чанарын шаардлага ч улам бүр өсөж байна. Энэхүү сургалтын хөтөлбөр нь дэлхийн жишиг болсон ISO/IEC 17025 стандартыг суурь болгон, лабораторийн ажилтнуудын мэдлэг, ур чадвар, хандлагыг шаталсан байдлаар системтэйгээр хөгжүүлэхийг гол зорилгоо болгожээ.
Энэ удаагийн анхан шатны хөтөлбөрөөр оролцогчид стандартын суурь ойлголтоос гадна дээж хүлээн авалт, бүртгэлийн процесс болон лабораторийн үйл ажиллагаанд хамгийн чухалд тооцогддог мэргэжлийн ёс зүй, нууцлал, баримтжуулалтын талаар нарийвчилсан мэдлэг авсан байна.
Сургалтад хамрагдсанаар мэргэжилтнүүд лабораторийнхоо үйл ажиллагааг олон улсын стандартад нийцүүлэн удирдах, эрсдэлийг үнэлэх, шинжилгээний үр дүнг баталгаажуулах суурь арга барилд суралцсан бөгөөд сургалтаас олгосон сертификат нь цаашид ISO/IEC 17024 стандартад нийцсэн ажилтны баталгаажуулалтын шалгалтад оролцох суурь нөхцөл болох юм.
