СҮХБААТАР АЙМАГ ДАХЬ САЛБАР ТАНХИМЫН БҮХ ГИШҮҮДИЙН ХУРАЛ АМЖИЛТТАЙ ЗОХИОН БАЙГУУЛАГДЛАА
МҮХАҮТ-ын Сүхбаатар аймаг дахь салбар танхимын "Бүх гишүүдийн хурал" амжилттай боллоо. Тус хуралд салбар танхимын удирдлагууд, орон нутгийн төр захиргааны байгууллагын төлөөлөл болон гишүүн бизнес эрхлэгчид оролцож, бүсийн бизнесийн орчныг сайжруулах, танхимын бүтэц зохион байгуулалтыг шинэчлэх асуудлуудыг хэлэлцлээ.
Хурлын үйл ажиллагааг МҮХАҮТ-ын Дэд захирал Ч.Баттулга нээж үг хэлсэн бөгөөд Сүхбаатар аймгийн Засаг дарга М.Идэрбат орон нутгийн бизнес эрхлэгчдэд мэндчилгээ дэвшүүлж, төрөөс баримталж буй бизнесийн орчны бодлогын дэмжлэгүүдийн талаар танилцуулав. Мөн Улсын Их Хурлын гишүүн Ж.Батсуурь, У.Отгонбаяр нар хурлын төлөөлөгчдөд баяр хүргэж, мэндчилгээ илгээсэн юм. Үргэлжлүүлэн МҮХАҮТ-ын ГСТАХГ-ын дарга М.Очирбат танхимын үндсэн үйл ажиллагааг танилцуулсан бол аймгийн Татварын газраас бизнес эрхлэгчдэд зориулсан татварын албаны мэдээлэл, зөвлөгөө өгч, Сүхбаатар аймаг дахь салбар танхимын дарга Б.Мөнхбат үйл ажиллагаа болон санхүүгийн тайлангаа танилцуулж, гишүүдийн сонирхсон асуултад хариулт өгөв.
Хурлын төгсгөлд салбар танхимын даргад нэр дэвшигчдийг танилцуулж, санал хураалт явуулснаар Сүхбаатар аймаг дахь салбар танхимын дарга Б.Мөнхбатыг хуралд оролцогчдын 100 хувийн саналаар улируулан сонгож, улмаар салбарын 9 тэргүүлэгчийг баталлаа.
Удирдлагын бүрэлдэхүүнээ шинэчилсэн тус салбар танхим нь цаашид орон нутгийн бизнес эрхлэгчдийг дэмжих, тэдний хамтын ажиллагааг өргөжүүлэхэд анхаарч ажиллахаа мэдэгдлээ.
