ОЛОН УЛСЫН ХӨДӨЛМӨРИЙН БАЙГУУЛЛАГА (ОУХБ)-ЫН ТӨЛӨӨЛӨГЧИДТЭЙ УУЛЗАЛТ ХИЙЛЭЭ

Уулзалтаар МҮХАҮТ-ын Гүйцэтгэх захирал Ц.Магнайбаатар, Ерөнхий нарийн бичгийн дарга Б.Саруул нар ОУХБ-ын БНХАУ, Монгол Улсыг хариуцсан товчооны захирал Чанхи Ли, Монгол дахь Үндэсний зохицуулагч П.Болормаа нарыг хүлээн авч уулзан, хамтран хэрэгжүүлсэн ажлуудаа дүгнэхийн зэрэгцээ цаашид Монгол Улсад хэрэгжүүлэх үйл ажиллагааныхаа талаар санал солилцлоо.

Энэ үеэр МҮХАҮТ-ын Гүйцэтгэх захирал Ц.Магнайбаатар дэлхий дахинд шинээр тавигдаж буй шударга шилжилт, ногоон шилжилтийг дотоодын аж ахуйн нэгжүүдэд зохистойгоор хэрэгжүүлэхэд ОУХБ-тай хамтран ажиллах нь чухал ач холбогдолтойг онцлов. Түүнчлэн Монгол Улсын хөдөлмөрийн зах зээлд чадвартай дунд болон дээд шатны удирдлага, боловсон хүчин дутмаг байгааг тэмдэглээд, энэ чиглэлд ОУХБ-тай нягт хамтран ажиллахаа илэрхийлсэн юм.

Өдгөө МҮХАҮТ нь Олон улсын хөдөлмөрийн байгууллагатай хамтран хувийн хэвшил, аж ахуйн нэгжүүдийн БОНЗ (Байгаль орчин, нийгэм, засаглал)-ын хүрээнд хэрэгжүүлж буй үйл ажиллагааг сайжруулах зорилгоор "LEADER" хөтөлбөрийг хэрэгжүүлэн ажиллаж байна.