ДААТГАЛЫН САЛБАРЫН ХУУЛЬ ТОГТООМЖИЙГ САЙЖРУУЛАХ ХЭРЭГЦЭЭ ШААРДЛАГЫН ТАЛААР ХЭЛЭЛЦҮҮЛЭГ БОЛЛОО
Даатгалын салбарын хууль эрх зүйн орчныг сайжруулах хэрэгцээ шаардлагын талаар салбарын мэргэжлийн оролцогсод болон даатгуулагч аж ахуйн нэгжүүдийн төлөөллийг оролцуулсан хэлэлцүүлэг боллоо. Хэлэлцүүлэгт УИХ-ын гишүүн Б.Пунсалмаа, Л.Энхнасан, П.Ганзориг нар оролцож, даатгалын салбарын шинэчлэлийн зорилго, УИХ дээр байгуулагдсан ажлын хэсгийн үйл ажиллагааны талаар мэдээлэл өгч, бизнес эрхлэгчид ба салбарын төлөөллийн саналыг сонсов.
Өнөөдөр мөрдөгдөж буй хууль тогтоомж нь зах зээлийн бодит эрэлт хэрэгцээ, цахим шилжилт болон бизнесийн шинэ төрлийн эрсдэлүүдийг зохицуулж чадахгүй байгаа талаар болон даатгалын салбарын оролцогсдын үүрэг оролцоог тодорхой болгох, даатгалын нэгдсэн системтэй болох, даатгалын талаарх мэдлэг ойлголтыг сайжруулах, нөхөн төлбөр олголтыг цахимжуулж ил тод болгох шаардлага байгааг талаар тодорхой саналуудыг оролцогсод хэлэв. Мөн хуулийн үзэл баримтлал, хуулийн төслийг боловсруулахдаа салбарын мэргэжлийн төлөөллийн санал бодлыг сайтар сонсож тусгах зүйтэйг анхаарууллаа.
Хэлэлцүүлгийн үеэр аж ахуйн нэгжүүдийн авч байгаа нөхөн төлбөрт НӨАТ ноогдуулж байгааг хүлээн зөвшөөрөх боломжгүй талаар хөндсөн бөгөөд энэхүү асуудлыг татварын хуулийн шинэчлэлийн хүрээнд шийдвэрлүүлэх нь зүйтэй гэдэг дээр санал нэгдлээ.
УИХ-ын гишүүн П.Ганзориг хэлэлцүүлгийн үеэр, бид даатгалыг зөвхөн эдийн засаг биш, иргэдийн амьжиргааг хамгаалдаг нийгмийн чухал тулгуур гэж харах ёстой. Хөгжилтэй орнуудад санхүүгийн зах зээлийн 25 хувийг даатгал эзэлж, байна. Гэтэл манайд энэ үзүүлэлт хангалтгүй хэвээр байна. Даатгал бол айл өрхийг гэнэтийн эрсдэл, ядуурлаас хамгаалах гол баталгаа юм. Тиймээс бид иргэд даатгалд хамрагдах таатай нөхцөлийг бодлогоор дэмжиж, бүтээгдэхүүн, үйлчилгээний хүртээмжийг үндсээр нь сайжруулах шаардлагатай байна гэдгийг онцоллоо.
Мөн УИХ-ын гишүүн Б.Пунсалмаа, Өнөөдөр бид даатгалын салбарын асуудлыг ярихдаа нэг зүйлийг маш сайн анхаарах ёстой. Иргэд, аж ахуйн нэгжүүдээс яг ямар төрлийн даатгал дээр хамгийн их гомдол ирж байна вэ гэдгийг бид хэлбэр бүрээр нь нарийвчлан судлах цаг болсон. Тэгээд энэ бүх гомдол, маргаан, цаашлаад буцаан олголтын асуудлыг нэг мөр цэгцлэхийн тулд даатгалын нэгдсэн систем, нэг технологийн шийдэлд шилжүүлэх шаардлагатай байна. Үүнээс гадна, манай улс дотоодынхоо зах зээлийн онцлогийг шингээсэн үндэсний давхар даатгалын тогтолцоог бүрдүүлэх ёстой гэлээ.
Хэлэлцүүлгийн төгсгөлд МҮХАҮТ-ын Ерөнхийлөгч Б.Лхагважав, Манай улсын санхүүгийн зах зээлд даатгалын үйлчилгээ дөнгөж 4-5 хувийг эзэлж байгаа нь даатгалын салбарт хөрөнгө оруулалт татахад бодлогын дэмжлэг хэрэгтэй, татварын ялгаваргүй орчинг бий болгохын тулд даатгалын хуулийн шинэчлэлийг хийх зайлшгүй шаардлагатайг дурдлаа.
