КАНАД УЛСАД ЗОХИОН БАЙГУУЛАХ "БИЗНЕС ФОРУМ"-ЫН БЭЛТГЭЛ АЖЛЫГ ХАНГАХ ОНЛАЙН УУЛЗАЛТ БОЛЛОО
МҮХАҮТ, Монгол Улсаас Канад Улсад суугаа Элчин сайдын яам болон Монголын Хөрөнгийн биржийн төлөөллүүд хамтарсан онлайн уулзалт зохион байгууллаа.
Уулзалтад Монгол Улсаас Канад Улсад суугаа Онц бөгөөд Бүрэн эрхт Элчин сайд Э.Сарантогос, ЭСЯ-ны зөвлөх М.Батхуяг, МҮХАҮТ-ын ЕНБД Б.Саруул, ГХХАГ-ын дарга Э.Солонго, мэргэжилтэн Э.Баясгалан болон МХБ-ийн Бизнес, хөгжил хариуцсан газрын ахлах мэргэжилтэн П.Нямдорж, төлөөлөгч Ш.Мөнгөншагай, Д.Мөнхбат нар оролцож, форумын бэлтгэл ажлыг үр дүнтэй хангах талаар хэлэлцэв.
Энэ үеэр Канад болон Америкийн зах зээл дэх хамтын ажиллагааны боломжуудыг судалж, холбогдох байгууллагуудтай түншлэл тогтоох чиглэлүүдийг тодорхойлсон юм. Тодруулбал, худалдааны агентлагуудад албан бичиг хүргүүлэх, Employer ILO байгууллагатай хамтрах болон Оттава хотноо холбооны засгийн газрын байгууллагуудтай уулзалт товлох боломжуудыг ярилцлаа. Мөн Канадын тал ирэх 9 дүгээр сарын 21-нд болох санхүүгийн семинарт оролцох сонирхлоо илэрхийлсэн тул бизнесийн төлөөллүүдийг өргөнөөр хамруулахаар санал нэгдэв.
Монголын Хөрөнгийн биржийн зүгээс Торонтогийн хөрөнгийн биржтэй хэрэгжүүлж буй хамтын ажиллагаагаа танилцуулж, энэ жил 3 дахь удаагаа уламжлал болгон зохион байгуулах уг семинарын хүрээнд уулзалт, үзэсгэлэнг хамтатгах боломжтойг мэдээллээ.
Цаашид форумд оролцох байгууллагуудын бүрэлдэхүүн, хувьцаат компаниудын оролцоо болон Торонто хотод үйл ажиллагаа явуулдаг ААН-үүдийг татан оролцуулах асуудлыг нарийвчлан төлөвлөхөөр боллоо. Түүнчлэн бизнесийн уулзалт (matchmaking)-ийг үр дүнтэй болгох үүднээс визийн мэдүүлэг, оролцогчдын бүртгэл, албан хүсэлтийн бэлтгэлийг эртнээс хангахаар тогтов.
