СОР17 БАГА ХУРЛЫН ХҮРЭЭНД ХУВИЙН ХЭВШЛИЙН ТҮНШЛЭЛИЙГ БЭХЖҮҮЛЭХ ЗӨВЛӨЛДӨХ УУЛЗАЛТ БОЛЛОО
COP17 бага хурлын хүрээнд хувийн хэвшлийн байгууллагуудтай хийх зөвлөлдөх уулзалтаас гаргасан уриалга
Тогтвортой хөгжил бол зөвхөн төрийн бодлого биш юм. Энэ бол өрсөлдөх чадварын шинэ шалгуур, хөрөнгө оруулалт татах үндсэн нөхцөл, бизнесийн тасралтгүй, тогтвортой байдлын стратеги юм. Иймд Монголын Үндэсний Худалдаа Аж Үйлдвэрийн Танхим, түүний Удирдах зөвлөл болон нийт гишүүн байгууллагуудын өмнөөс Монголын нийт хувийн хэвшил, хөрөнгө оруулагчдад дараах УРИАЛГЫГ дэвшүүлж байна:
• Үндэсний тодорхойлсон хувь нэмэр (NDC3.0) болон Тогтвортой хөгжлийн зорилтуудыг байгууллагынхаа стратеги, үйл ажиллагаа, хөрөнгө оруулалтын салшгүй хэсэг болгоё;
• Цөлжилт, газрын доройтолтой тэмцэхэд бодит хөрөнгө оруулалт, хамтын ажиллагааг өргөжүүлье;
• БОНЗ (ESG)-ын ил тод тунгалаг тайлагнал, ёс зүй, хариуцлагатай засаглалыг хэвшүүлье;
• Бизнесийн үйл ажиллагаанаас үүдэлтэй хүлэмжийн хийн ялгарлыг хэмжиж, хянаж, бууруулж, эрчим хүч, ус, байгалийн нөөцийн үр ашигтай хэрэглээг нэмэгдүүлье;
• Тойрог эдийн засгийн зарчимд нийцсэн тогтвортой үйлдвэрлэл, инновацыг эрчимжүүлэхийг уриалж байна.
Өнөөдрийн хамгийн том эрсдэл бол өөрчлөлтөөс хоцрох явдал юм.
Цөлжилттэй тэмцэх тухай НҮБ-ын Конвенцын Талуудын 17 дугаар бага хурал (СОР17)-ын бэлтгэл ажлыг хангах, тус хуралд хувийн хэвшлийн оролцоог нэмэгдүүлэх зорилготой зөвлөлдөх уулзалт амжилттай зохион байгуулагдлаа. СОР17 Үндэсний хорооны Ажлын алба, Монголын Үндэсний Худалдаа Аж Үйлдвэрийн Танхим болон Монголын Бизнесийн Зөвлөл хамтран зохион байгуулсан тус уулзалтад хувийн хэвшил болон олон улсын төрийн бус байгууллагын 100 гаруй төлөөллүүд оролцлоо.
Уулзалтын эхэнд Байгаль орчин, уур амьсгалын өөрчлөлтийн Сайд Ц.Сандаг-Очир, МҮХАҮТ-ын Ерөнхийлөгч Б.Лхагважав нар нээлтийн үг хэлж, хувийн хэвшлийн түншлэл, хамтын ажиллагаа уур амьсгалын өөрчлөлт, цөлжилтийн эсрэг үйл хэрэгт ямар чухал үүрэгтэйг онцлов.
Мөн БОУАӨ-ийн Дэд сайд Б.Мөнхтамир СОР17 хурлын үеэр Монгол Улсын зүгээс дэвшүүлж буй санаачилгууд, тэдгээрийн боломж болон бэлтгэл ажлын хүрээнд тулгамдаж буй асуудлуудыг танилцуулсан бөгөөд "Business Council of Mongolia"-ын Гүйцэтгэх захирал Н.Сувд "Business For Land" (B4L) санаачилгыг оролцогчдод дэлгэрэнгүй танилцууллаа.
Түүнчлэн хувийн хэвшлийнхэнд тус бага хурлыг дэмжин ажиллах хандив, тусламжийг төвлөрүүлэх, зарцуулах түр журмыг СОР17 Үндэсний хорооны Ажлын албанаас танилцуулж, тулгамдсан асуудлуудын талаар панел хэлэлцүүлэг өрнүүлэв.
Уулзалтын төгсгөлд МҮХАҮТ-ын Ерөнхийлөгчийн Зөвлөх М.Сарандаваа танхимын гишүүдийн оролцох боломжуудын талаар мэдээлэл өгч, БОУАӨ-ийн Дэд сайд Б.Мөнхтамир уулзалтыг хааж үг хэлснээр талууд цаашдын хамтын ажиллагааг хамтран хэрэгжүүлэхээр нэгдсэн ойлголтод хүрлээ.
