АЗИЙН УУЛ УУРХАЙН ДЭЭД ХЭМЖЭЭНИЙ ФОРУМД МOНГОЛ УЛСЫН ХӨРӨНГӨ ОРУУЛАЛТЫН ОРЧНЫГ СУРТАЛЧИЛЛАА

БНХАУ-д зохион байгуулагдаж буй Азийн уул уурхайн салбарын хамгийн нөлөө бүхий цугларалт болох “V удаагийн Азийн уул уурхайн инновац, хөгжлийн дээд хэмжээний форум”-д МҮХАҮТ-ын төлөөлөгчид амжилттай оролцлоо. Энэ жилийн чуулга уулзалт “Уул уурхай + Санхүү” хос хөдөлгүүрээр гадаад дахь уул уурхайн өсөлтийн шинэ гарцыг тодорхойлох” гэсэн сэдвийн хүрээнд өрнөж буй бөгөөд бүс нутгийн хөрөнгө оруулалт, санхүүжилт, технологийн шинэчлэлийг уялдуулан хөгжүүлэх гарцуудыг хэлэлцэж буй өндөр түвшний уулзалт болж өндөрлөв.

Тус форумд МҮХАҮТ-ын Гүйцэтгэх захирал Ц.Магнайбаатар болон МҮХАҮТ-ын БНХАУ дахь Төлөөлөгчийн газрын тэргүүн, гүйцэтгэх захирал О.Амарболд тэргүүтэй төлөөлөгчид оролцон, “Монгол Улсын уул уурхайн хөрөнгө оруулалтын орчин” сэдэвт салбар хуралдаанд МҮХАҮТ-ын Гүйцэтгэх захирал Ц.Магнайбаатар илтгэл тавилаа. Тэрээр гадаадын томоохон хөрөнгө оруулагчдад хандан Монгол Улсын хөрөнгө оруулалтын өнөөгийн уур амьсгал, уул уурхайн салбарын бодлогын чиг хандлага, эрх зүйн шинэчлэл болон төр-хувийн хэвшлийн түншлэлийн хүрээнд нээгдэж буй шинэ боломжуудыг дэлгэрэнгүй танилцуулав. Ялангуяа манай улсын стратегийн ашигт малтмалын нөөц баялаг, бүс нутгийн тогтвортой хөгжилд гүйцэтгэх үүрэг, урт хугацааны хамтын ажиллагааны давуу талуудыг онцлон тэмдэглэсэн нь чуулганд оролцогчдын анхаарлыг ихээхэн татлаа.

Хоёр өдрийн турш үргэлжилсэн тус форумаар зөвхөн олборлолт бус, уул уурхайн салбарын дижитал шилжилт, ногоон хөгжлийн бодлого, олон улсын санхүүжилтийн шинэ механизм болон хил дамнасан хөрөнгө оруулалтын асуудлуудыг маш өргөн хүрээнд хэлэлцсэн юм.

Форумын үеэр зохион байгуулагдсан бизнес уулзалтууд нь олон улсын компаниуд болон хөрөнгө оруулагчдад харилцан ашигтай түншлэл тогтоох бодит боломжийг олголоо.