УРИАЛГА - Бизнесийнхэн хамтдаа хүндрэлийг даван туулъя!
Хөрш БНХАУ-д гарсан шинэ коронавирусын тархалтаас сэргийлэх зорилгоор үүссэн нөхцөл байдалд МҮХАҮТ-ын зүгээс дүн шинжилгээ хийж, юуны өмнө хүнсний гол нэр төрлийн бүтээгдэхүүний нийлүүлэлтэд гарч болох хомсдол, үнийн өсөлт зэргийг тодорхойлох зорилготой хүнсний томоохон үйлдвэрлэгч, импортлогчидтой уулзалтуудыг зохион байгуулж, гарсан саналуудыг нэгтгэн УИХ, Монгол Улсын Засгийн газарт уламжилсан билээ. Үүний үр дүнд өргөн хэрэглээний хүнсний зарим барааны нийлүүлэлт, үнийг тогтвортой байлгах зорилгоор тэдгээр барааны гаалийн болон нэмэгдсэн өртгийн албан татвар төлөх хугацааг 2 хүртэл сараар сунгах, мөн 2020 оны 6 дугаар сарын 30-ны өдрийг хүртэл гаалийн болон импортын барааны нэмэгдсэн өртгийн албан татвараас чөлөөлөх хуулийн төсөл УИХ-д өргөн барих шийдвэр гаргаж байгааг талархан хүлээн авч байна. Цаашид ч гэсэн бизнесийнхэн хамтдаа тулгарч буй асуудал, гарах гарцаа тодорхойлж, төр засагтаа хандан шийдвэрлүүлэх боломж байна гэж харж байна.
Сургууль, цэцэрлэг, их дээд сургуулийн үйл ажиллагааг түр хугацаагаар хаасан, олон нийтийн үзвэр үйлчилгээний газруудыг хааж, зарим үйлчилгээний газарт цагийн хязгаарлалт хийсэн, Хятад улстай хиллэдэг боомтуудыг хаасан, мөн цагаан сарыг бүх нийтээр тэмдэглэхгүй болсноос шалтгаалан бизнес эрхлэх нөхцөл байдал хүндэрч, бизнес эрхлэгчид санхүүгийн алдагдал хүлээх боллоо. Энэ хүнд нөхцөл байдалд бизнесийнхэн харилцан ойлголцож, зээл ба хүүгийн төлбөрт уян хатан хандах, зээлийн бүтцийн өөрчлөлт хийх, түрээсийн төлбөрийг бууруулах ба хойшлуулах, торгууль алдангиас чөлөөлөх зэргээр зээлдэгч, түрээслэгчдэд дэмжлэг үзүүлэхийг Банк, Банк бус санхүүгийн байгууллагууд ба Түрээслүүлэгч аж ахуйн нэгжүүдэд уриалж байна.
Бизнесийнхэн бид уян хатан байж, хамтдаа хүндрэлийг давах болно.
