ЛИН И ХОТЫН ДИЖИТАЛ ШИЙДЛҮҮД БА МОНГОЛЫН БИЗНЕС ЭРХЛЭГЧДЭД НЭЭГДЭХ ШИНЭ БОЛОМЖУУД

2026/05/15 0

БНХАУ-ын Шаньдун мужийн Лин И хотод зохион байгуулагдсан "Бүх Хятадын дижитал худалдааны үзэсгэлэн" худалдаанд МҮХАҮТ-ын дэд захирал Ч.Баттулга бизнесийн төлөөллүүдийн хамт оролцлоо.

Лин И хот нь Хятадын хойд бүс нутгийн худалдаа, логистикийн хамгийн том зангилаа төдийгүй 130 гаруй төрөлжсөн зах, худалдааны төвүүд нь улсдаа түгээлтийн гол бааз суурь болдог учраас манай төлөөлөгчдийн хувьд туршлага судлах чухал талбар байв.

Тус үзэсгэлэнгийн үеэр Хятадын олон муж, хотуудын дижитал худалдаа эрхлэгчид болон логистикийн компаниуд хамгийн сүүлийн үеийн технологио танилцуулж, ялангуяа шууд дамжуулалтаар борлуулалт хийх шинэ үеийн худалдааны арга барилыг газар дээр нь харуулж байлаа.

Мөн Лин И хотын тээвэр, логистикийн төвүүд, автоматжуулсан агуулахын цогцолбор болон худалдаа түгээлтийн үйл ажиллагаатай биечлэн танилцаж, тус салбарын төлөөллүүдтэй Монгол-Хятадын худалдааны эргэлтийг нэмэгдүүлэх, тээвэр логистикийн хамтын ажиллагааг шинэ шатанд гаргах талаар ажил хэрэгч саналуудыг солилцлоо.

Хөрш орныхоо цахим худалдаа, тээврийн нэгдсэн тогтолцоотой биечлэн танилцсан нь олон улсын шилдэг туршлагыг нэвтрүүлэх, улмаар гадаад хамтын ажиллагаагаа шинэ шатанд гаргах бодит боломжийг нээж өглөө.