ШАНХАЙ ХОТЫН ЕРӨНХИЙ КОНСУЛ Д.БОЛД МОНГОЛЫН БИЗНЕС ТӨЛӨӨЛӨГЧДИЙГ ХҮЛЭЭН АВЧ УУЛЗАВ
Монголын Үндэсний Худалдаа, Аж Үйлдвэрийн Танхимаас зохион байгуулж буй Хятад улсын Шанхай хотын аж үйлдвэр, тоног төхөөрөмж үйлдвэрлэгч тэргүүлэгч компаниудтай танилцах, туршлага судлах бизнес аялал амжилттай үргэлжилж байна.
Аяллын хүрээнд төлөөлөгчид эко барилгын материал, сэргээгдэх эрчим хүч болон нарны панелийн үйлдвэрлэлээр дэлхийд танигдсан "China Triumph International Engineering Co., Ltd" компанид зочиллоо.
Тус компанийн удирдлагуудтай хийсэн уулзалтаар талууд бүтээгдэхүүн нийлүүлэлтийг тогтворжуулах, дэвшилтэт технологийн хөрөнгө оруулалт татах болон хоёр улсын эрчим хүчний салбарын хамтын ажиллагааны боломжуудыг нарийвчлан судлав.
Мөн /2026.05.12/ Монгол Улсаас Шанхай хотод суугаа Ерөнхий консул Д.Болд бизнес төлөөлөгчдийг хүлээн авч уулзан, бүс нутгийн хэмжээнд бизнес эрхлэгчдийн хэлхээ холбоог бэхжүүлэх, экспортыг дэмжих, худалдааны эргэлтийг нэмэгдүүлэхэд бүх талын дэмжлэг үзүүлэн хамтран ажиллахаа илэрхийллээ.
Мөн манай аж ахуйн нэгжүүд дэлхийн санхүү, технологийн төв болсон тус хотын туршлагаас суралцаж, инновацийг нутагшуулах нь дотоодын эдийн засагт чухал ач холбогдолтойг онцлон тэмдэглэв.
Энэхүү аялал нь Монголын бизнес эрхлэгчид ногоон технологийн шийдлүүдтэй газар дээр нь танилцаж, гадаад зах зээлд өрсөлдөх чадвараа нэмэгдүүлэх өндөр үр дүнтэй арга хэмжээ боллоо.
