“WEIDE INSPIRATION / PARTNER TALK SERIES” ВЕБИНАР АМЖИЛТТАЙ ЗОХИОН БАЙГУУЛАГДЛАА
Дэлхийн худалдааны байгууллага болон Олон улсын худалдааны төв (ITC)-тэй хамтран хэрэгжүүлж буй “Цахим эдийн засаг дахь эмэгтэй экспортлогчдыг дэмжих” (WEIDE) төслийн хүрээнд “WEIDE Inspiration / Partner Talk Series” вебинар амжилттай зохион байгуулагдлаа.
Тус вебинарт МҮХАҮТ-ын Ерөнхий нарийн бичгийн дарга Б.Саруул болон Төсөл, хөтөлбөрийн газрын дарга А.Энэрэл нар оролцов. Вебинарын үеэр ЕНБД Б.Саруул эмэгтэй бизнес эрхлэгчдийн экспортын чадавхыг нэмэгдүүлэх, олон улсын зах зээл дэх оролцоог өргөжүүлэхийн ач холбогдлыг онцлон тэмдэглэлээ.
Мөн вебинарын үеэр спортын эдийн засаг, дижитал орчин болон үндэсний брэндүүдийн уялдаа холбоо эрчимтэй тэлж буйг харуулсан Comscore-ийн судалгааны үр дүнг дурдан, спортын экосистем дэх шинэ боломжуудын талаар танилцууллаа. Судалгаанд дурдсанаар, 2022 оны Бээжингийн өвлийн олимптой харьцуулахад өнгөрсөн жилийн өвлийн олимптой холбоотой контентын нийгмийн оролцоо нээлтийн ёслолын үеэр 179 хувиар өссөн бөгөөд загвар, хувцас дизайнтай холбоотой хайлтууд хамгийн өндөр хандалттай сэдвүүдийн нэг болсон байна. Энэ нь спортын томоохон арга хэмжээнүүд нь зөвхөн спортын агуулгаар хязгаарлагдахгүй, үндэсний брэнд, бүтээлч үйлдвэрлэл, соёлын бүтээгдэхүүнийг олон улсын түвшинд таниулах стратегийн чухал талбар болж буйг харууллаа.
Энэ хүрээнд Гоёл кашмер ХХК-ийн брэндийг вебинарын онцлох кейсээр сонгон оролцуулсан бөгөөд тус компани Монголын олимпын багийн хувцсыг урласан үндэсний брэндийн хувьд олон улсын анхаарлыг амжилттай татсан бодит туршлагаа хуваалцав. Олимпын дараахан Google Trends-ийн мэдээллээр тус брэндийн хайлт мэдэгдэхүйц өссөн нь олон улсын спортын арга хэмжээг брэндийн үнэ цэнэ, дижитал харагдах байдал болон экспортын боломж болгон үр дүнтэй ашиглаж чадсан бодит жишээ болсон юм.
Тус вебинарт WEIDE төсөл хэрэгжиж буй дөрвөн улсын эмэгтэй бизнес эрхлэгчид болон SheTrades Mongolia Hub-н бизнес эрхлэгч эмэгтэйчүүд оролцож, Гоёл кашмер ХХК-ийн олон улсын брэнд хөгжүүлэлт, дижитал харагдах байдал, брэндээрээ дамжуулан түүх өгүүлэх арга барил болон стратегийн туршлагаас хуваалцлаа.
