МҮХАҮТ-ЫН ГИШҮҮД БНХАУ-ЫН ТЭРГҮҮЛЭХ ҮЙЛДВЭРҮҮДТЭЙ ХАМТЫН АЖИЛЛАГААГАА ЭХЛҮҮЛЭВ
МҮХАҮТ-ын болон орон нутгийн гишүүн байгууллагууд БНХАУ-ын Шанхай, Чанжао хотуудын тэргүүлэх үйлдвэрүүдийн үйл ажиллагаатай танилцаж, туршлага судлах аялалд оролцож байна.
Аяллын хүрээнд сэргээгдэх эрчим хүчний салбарт дэлхийд тэргүүлэгч "Trinasolar LLC" болон ногоон эрчим хүчний "Wxlong Max LLC" үйлдвэрүүдэд зочилж, орчин үеийн дэвшилтэт технологи, эрчим хүчний хэмнэлттэй шийдлүүдтэй газар дээр нь танилцлаа.
Мөн хүнсний үйлдвэрлэлийн салбарт дэлхийд танигдсан "Yili" сүү, сүүн бүтээгдэхүүний үйлдвэрийн үйл ажиллагааг судалж, үйлдвэрлэлийн автоматжуулалт болон чанарын хяналтын стандартын талаар туршлага солилцов.
Энэ үеэр үйлдвэрүүдийн удирдлагуудтай B2B уулзалтуудыг зохион байгуулж, технологи нэвтрүүлэх, экспортын гарцыг нэмэгдүүлэх болон хөрөнгө оруулалтын чиглэлээр хамтын ажиллагааны бодит боломжуудыг хэлэлцлээ.
Тус аялал нь гишүүн байгууллагуудын хувьд олон улсын зах зээлд өрсөлдөх чадвараа нэмэгдүүлэх, ногоон эдийн засгийн шилжилтийг Монголд нутагшуулах чухал ач холбогдолтой алхам болж байна.
