МОНГОЛ-СЕРБИЙН ЭДИЙН ЗАСГИЙН ТҮНШЛЭЛИЙГ ЛОЖИСТИК, ЭРҮҮЛ МЭНД, БАРИЛГЫН САЛБАРТ ӨРГӨЖҮҮЛЭН ХӨГЖҮҮЛЭХЭЭР ТОХИРОЛЦОВ
Бүгд Найрамдах Серби Улсын Гадаад харилцааны яамны Төрийн нарийн бичгийн дарга Дамжан Йович Монгол Улсад хийж буй айлчлалынхаа хүрээнд дотоодын бизнесийн төлөөлөл болон МҮХАҮТ-ын удирдлагуудтай уулзаж, хоёр улсын эдийн засаг, худалдаа, хөрөнгө оруулалтын түншлэлийг өргөжүүлэх асуудлаар өргөн хүрээнд санал солилцлоо. МҮХАҮТ болон Гадаад харилцааны яам хамтран зохион байгуулсан тус уулзалтад ложистик, эрүүл мэнд, барилга, мэдээллийн технологийн салбарын төлөөллүүд оролцож, хамтын ажиллагааны шинэ боломжуудыг эрэлхийлэв.
Уулзалтын үеэр МҮХАҮТ-ын Ерөнхий нарийн бичгийн дарга Б.Саруул Монгол Улсын эдийн засгийн өнөөгийн нөхцөл байдал, уул уурхай, ноолуур, махны экспортын нөөц боломж болон сэргээгдэх эрчим хүч, дэд бүтцийн томоохон төслүүдийг танилцуулж, гадаадын хөрөнгө оруулалтыг татах таатай орчны талаар дэлгэрэнгүй мэдээлэл өглөө. Тэрээр Монгол Улс дэлхийн 160 гаруй улстай худалдаа хийж байгааг онцлоод, цаашид нэмүү өртөг шингэсэн бүтээгдэхүүний экспортыг дэмжихэд Серби улстай хамтран ажиллах сонирхолтой байгаагаа илэрхийлэв.
Төрийн нарийн бичгийн дарга Дамжан Йович Серби улсын эдийн засгийн давуу тал болох Европын Холбоо болон БНХАУ-тай байгуулсан чөлөөт худалдааны хэлэлцээрүүд, мэдээллийн технологи, эм үйлдвэрлэл, ложистикийн салбарын туршлагаа танилцуулж, Монгол Улстай түншлэлээ бэхжүүлэх сонирхолтой байгаагаа тэмдэглэлээ. Ялангуяа Монголын ложистикийн компаниуд Сербийн агуулах, тээврийн төвүүдийг түшиглэн Европын зах зээлд ноолууран бүтээгдэхүүн экспортлох боломж, Сербийн ложистикийн программ хангамжийг Монголд нэвтрүүлэх асуудлыг онцлон хэлэлцсэн юм.
Эрүүл мэндийн салбарын хүрээнд Сербийн өндөр технологийн эмнэлгийн тоног төхөөрөмж, рентген аппарат болон эмийн үйлдвэрлэлийн компаниудтай шууд харилцаа тогтоох, мэргэжилтэн солилцох асуудлаар тохиролцсон бол барилгын салбарынхан туршлага солилцох, ижил төрлийн холбоодтой хамтран ажиллах хүсэлтэй байгаагаа илэрхийллээ.
Талууд уулзалтын төгсгөлд худалдаа, хөрөнгө оруулалт, IT, эрүүл мэнд, барилга, сэргээгдэх эрчим хүч зэрэг олон салбарт хамтын ажиллагааг эрчимжүүлж, бизнес эрхлэгчдийг холбох "B2B" уулзалтуудыг тогтмолжуулахаар санал нэгдсэн юм.
