МҮХАҮТ БОЛОН ПУСАН ХОТЫН ХАҮТ ХАМТЫН АЖИЛЛАГААГАА ЭРЧИМЖҮҮЛЭХЭЭР ТОХИРОЛЦЛОО
Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав болон Гүйцэтгэх захирал Ц.Магнайбаатар нар Бүгд Найрамдах Солонгос Улсын Пусан хотын Худалдаа, аж үйлдвэрийн танхимд зочлон, хоёр байгууллагын 2005 онд эхлүүлсэн хамтын ажиллагааг шинэ шатанд гаргах талаар уулзалт хийлээ.
Уулзалтын үеэр МҮХАҮТ-ын Ерөнхийлөгч Б.Лхагважав болон Пусан хотын Худалдаа, аж үйлдвэрийн танхимын дарга Ян Жэ Сэн нар Хамтын ажиллагааны санамж бичигт гарын үсэг зурж, хоёр улсын бизнесийн байгууллагуудын хамтын ажиллагааг өргөжүүлэх, худалдаа, хөрөнгө оруулалт, бизнесийн солилцоог нэмэгдүүлэх талаар санал нэгдэв.
Энэхүү хамтын ажиллагааны хүрээнд Монголын бизнес эрхлэгчид зөвхөн Сөүл хот төдийгүй сүүлийн жилүүдэд эрчимтэй хөгжиж буй БНСУ-ын эдийн засгийн томоохон төв болох Пусан хоттой илүү өргөн хүрээнд хамтран ажиллах боломж нээгдэж байна. Пусан хот нь химийн үйлдвэрлэл, усан тээвэр, логистик болон аж үйлдвэрийн салбараараа тэргүүлэгч бөгөөд хамгийн сүүлийн үеийн статистикаар БНСУ-ын нийт дотоодын нийт бүтээгдэхүүний ойролцоогоор 4.6 хувийг бүрдүүлж буй эдийн засгийн чухал бүс нутаг юм.
Талууд жижиг, дунд үйлдвэрийг дэмжих, бизнесийн мэдээлэл солилцох, хамтарсан бизнес форум болон харилцан айлчлал зохион байгуулах, экспорт, импортын хамтын ажиллагааг өргөжүүлэх чиглэлээр бодитой хамтран ажиллахаар тохиролцов. Мөн Монгол Улс, БНСУ-ын хооронд хэлэлцэж буй “Эдийн засгийн түншлэлийн хэлэлцээр”-ийн тав дахь шатны хэлэлцээ нь хоёр улсын эдийн засаг, бизнесийн хамтын ажиллагааг шинэ шатанд гаргах чухал суурь болно гэдгийг талууд онцлон тэмдэглэлээ.
Түүнчлэн энэхүү арга хэмжээг амжилттай зохион байгуулахад үнэтэй хувь нэмэр оруулж, идэвхтэй хамтран ажилласан Монгол Улсаас БНСУ-ын Пусан хотод суугаа Консул Ц.Жадамбаа болон Монгол Улсаас БНСУ-ын Пусан хот дахь Консулын газрын хамт олонд МҮХАҮТ болон Монголын нийт бизнес эрхлэгчдийн нэрийн өмнөөс талархал илэрхийллээ.
