МЭРГЭЖЛИЙН БОЛОВСРОЛЫГ ҮНДЭСНИЙ ШИЛДЭГ 16 КОМПАНИТАЙ ХОЛБОЖ, ЗАЛУУСЫГ БАТАЛГААТАЙ АЖЛЫН БАЙРААР ХАНГАНА
Политехникийн 33 коллежийг үндэсний тэргүүлэх 16 аж ахуйн нэгжийн менежментэд шилжүүлж, хамтын ажиллагааг эхлүүлснээр мэргэжлийн боловсролын салбарт чанарын бодит өөрчлөлт гарч, хөдөлмөрийн зах зээлийн эрэлт нийлүүлэлтийн зөрүү арилах суурь нөхцөл бүрдэж байна.
Энэхүү түншлэлийн үр дүнд сургалтын хөтөлбөрүүд онол төдий байхаас татгалзаж, "М-Си-Эс", "Оюутолгой", "Эрдэнэт үйлдвэр", "МАК", "АПУ", "Таван Богд" зэрэг тэргүүлэгч компаниудын ашиглаж буй дэлхийн стандартын техник технологи, үйлдвэрлэлийн бодит талбарт суурилсан практик сургалт давамгайлах боломжтой боллоо.
Хувийн хэвшлийнхэн сургалтын үйл ажиллагаанд шууд оролцож, материаллаг баазыг шинэчлэн, багш нарыг үйлдвэрлэл дээр давтан сургаснаар төгсөгчид ажлын байранд очоод дахин суралцах шаардлагагүй, шууд ажиллах өндөр ур чадварыг эзэмших юм.
Түүнчлэн "Хурд Групп", "Макс Групп", "Гацуурт", "Өгөөж-Чихэр боов", "Монос Групп", "Эрдэнэс Монгол", "Энержи Ресурс", "Премиум нэксус", "Эрдэнэс Таван толгой" болон "Таван толгой" зэрэг салбар бүрийн төлөөллүүд өөрсдийн хүний нөөцийг захиалгаар бэлтгүүлж эхэлснээр залуучууд сургуулиа төгсөөд ажлын байр хайх биш, харин суралцах хугацаандаа ирээдүйн ажил олгогчтойгоо холбогдон, баталгаатай орлого, тогтвортой карьерын эхлэлийг тавих боломжтой юм.
Энэхүү төр, хувийн хэвшлийн нягт түншлэл нь үндэсний мэргэжилтэй ажиллах хүчний үнэлэмжийг нэмэгдүүлж, Монгол Улсын эдийн засгийн өрсөлдөх чадварыг дотоод нөөц бололцоогоороо дэмжих хамгийн үр дүнтэй шийдэл болж байна.
