САЛБАРЫН ЭКСПОРТЫГ ДЭМЖИХ ЧИГЛЭЛЭЭР ХАМТЫН АЖИЛЛАГААГАА ИДЭВХЖҮҮЛНЭ

2026/05/05 0

МҮХАҮТ-ын Ерөнхийлөгч Б.Лхагважав, дэд захирал Ч.Баттулга нар Хүнс, хөдөө аж ахуй, хөнгөн үйлдвэрийн сайд Ц.Идэрбаттай уулзалт хийж, салбарын хамтын ажиллагааг өргөжүүлэх болон бизнесийн орчныг сайжруулах асуудлаар санал солилцлоо. Талууд хүнс, хөдөө аж ахуй, хөнгөн үйлдвэрийн салбарын өрсөлдөх чадварыг дээшлүүлэх, нэмүү өртөг шингэсэн үйлдвэрлэлийг дэмжих, жижиг, дунд бизнес болон уул уурхайн бус экспортыг нэмэгдүүлэхэд бодлогын уялдаа холбоог бэхжүүлэх нь зүйтэй гэдэгт санал нэгдэв.

Ялангуяа малын гаралтай түүхий эд, хөдөө аж ахуйн бүтээгдэхүүний экспортыг нэмэгдүүлэх зорилгоор гадаад зах зээлд сурталчлан таниулах, олон улсын үзэсгэлэн худалдаанд хамтран оролцох асуудалд онцгой ач холбогдол өгч ажиллахаар боллоо.

Энэхүү хамтын ажиллагааны хүрээнд 2026 оны 11 дүгээр сард БНХАУ-ын Шанхай хотноо зохион байгуулагдах IX удаагийн “Хятадын олон улсын импортын экспо”-д салбарын аж ахуйн нэгжүүдийг нэгдсэн зохион байгуулалттайгаар оролцуулах талаар мөн ярилцав.

ХХААХҮ-ийн сайдын зүгээс тус үзэсгэлэн нь гадаад зах зээлийг тэлэхэд стратегийн чухал ач холбогдолтойг тэмдэглэж, яамны зүгээс дэмжлэг үзүүлэн оролцохоо илэрхийлэн, /2026.10.15-18/ өдрүүдэд болох “Улаанбаатар түншлэл-2026” олон улсын хүнсний салбарын үзэсгэлэнг хамтран ажиллах боломжтойг хэллээ.

Одоогийн байдлаар тус үзэсгэлэнд БНХАУ, ОХУ, БНСУ, Беларусь зэрэг улс орнуудын аж ахуйн нэгжүүд оролцох хүсэлтээ ирүүлээд байгаа бөгөөд энэ нь дотоодын үйлдвэрлэгчдэд шинэ технологи, инновац нэвтрүүлэх, олон улсын стандарт шаардлагад нийцэх, экспортын чадавхыг нэмэгдүүлэх боломжийг олгох юм.