МОНГОЛЫН ЭКСПОРТЛОГЧ АЖ АХУЙН НЭГЖҮҮД БАРАА БҮТЭЭГДЭХҮҮНЭЭ БНХАУ-ЫН WYPS КОМПАНИД ТАНИЛЦУУЛЛАА
МҮХАҮТ-ын Чөлөөт бүсийн нэгдсэн хөрөнгө оруулагчдын зөвлөлөөс БНХАУ-ын Ухань хотын "Wuhan Yangluo Port Service" (WYPS) компанийн төлөөлөгчид болон дотоодын экспортлогч аж ахуйн нэгжүүдийн хамтарсан уулзалтыг зохион байгууллаа.
Уулзалтад МҮХАҮТ-ын УЗ-ийн гишүүн, ЭЗКЧБТ-ын Ерөнхийлөгч бөгөөд МҮХАҮТ-ын Чөлөөт бүсийн нэгдсэн хөрөнгө оруулагчдын зөвлөлийн тэргүүн Ч.Амарбаатар болон дотоодын 20 гаруй бизнес эрхлэгч оролцож, хоёр улсын худалдаа, логистикийн хамтын ажиллагааны шинэ боломжуудыг хэлэлцэв.
Энэ үеэр Монголын экспортлогч аж ахуйн нэгжүүд өөрсдийн бараа бүтээгдэхүүний дээжийг дэлгэн танилцуулж, WYPS компанийн төлөөлөгчидтэй зах зээлд гарах боломжит гарцуудын талаар санал солилцсон юм.
WYPS компани нь Ухань хотын гадаад худалдааны платформ операторын хувьд "Санхүү + Үйлдвэрлэл" стратегийн хүрээнд 320,000 м² талбай бүхий "Huazhong" худалдаа, үйлчилгээний цогцолбор болон "Бүс ба Зам" үндэсний павильонуудаараа дамжуулан Монголын бараа бүтээгдэхүүнийг Хятадын зах зээлд гаргах, хил дамнасан цахим худалдааг дэмжихэд бэлэн байгаагаа илэрхийллээ.
Уулзалтын үеэр талууд логистик, санхүүжилтийн нэгдсэн экосистемийг ашиглан Монгол бүтээгдэхүүнийг БНХАУ-ын зах зээлд шууд нийлүүлэх, түгээх сүлжээг өргөжүүлэх чиглэлээр идэвхтэй хамтран ажиллана гэдгээ хэллээ.
