“БАЙГАЛЬ ОРЧИН, НИЙГЭМ, ЗАСАГЛАЛ (ESG)-ЫН СУРГАГЧ БАГШ БЭЛТГЭХ” СУРГАЛТ БОЛЛОО
Монголын Үндэсний Худалдаа Аж Үйлдвэрийн Танхимын дэргэдэх Бизнесийн Ёс Зүйн төв нь Олон Улсын Хөдөлмөрийн Байгууллага (ОУХБ)-ын LEADER хөтөлбөрийн хүрээнд “Байгаль орчин, нийгэм, засаглал (ESG)-ын сургагч багш бэлтгэх” 2 өдрийн сургалтыг амжилттай зохион байгууллаа.
Тус сургалт нь Монгол Улсын бизнесийн байгууллагуудын тогтвортой хөгжлийн ойлголтыг гүнзгийрүүлэх, ESG чиглэлээр дотоодын сургагч багш нарыг бэлтгэх, улмаар байгууллагуудын үйл ажиллагаанд олон улсын жишигт нийцсэн тогтвортой, хариуцлагатай менежментийг нэвтрүүлэхэд чиглэсэн юм. Сургалтад МҮХАҮТ-ийн дэргэдэх Бизнесийн Ёс Зүйн төвийн багш нар болон Голомт банк, Ханбогд Кашмер ХХК, Санхүү, эдийн засгийн их сургууль, АПУ ХК, Монголын Хөрөнгийн Бирж, Төрийн өмчийн бодлого, зохицуулалтын газрын төлөөлөл оролцож, ESG-ийн суурь ойлголт, олон улсын чиг хандлага, байгууллагын стратегид ESG-ийг хэрхэн тусгах, хэрэгжилтийг үнэлэх, тайлагнах арга зүйг судалж, цаашид өөрсдийн байгууллага болон салбартаа мэдлэг түгээх сургагч багшийн ур чадварыг эзэмшлээ.
Байгаль орчин, нийгэм, засаглал буюу ESG нь өнөөдөр бизнесийн тогтвортой өсөлт, өрсөлдөх чадварыг тодорхойлох чухал шалгуур үзүүлэлт болоод байгаа бөгөөд байгууллагууд байгаль орчинд үзүүлэх нөлөөллөө бууруулах, нийгмийн хариуцлагаа хэрэгжүүлэх, ил тод, хариуцлагатай засаглалыг бий болгох замаар урт хугацаанд үнэ цэнэ бүтээх боломжтой болж байна. Мөн ESG шалгуурыг хэрэгжүүлснээр хөрөнгө оруулалт татах боломж нэмэгдэх, эрсдэлийг бууруулах, олон улсын зах зээлд нэвтрэх нөхцөл бүрдэх, байгууллагын нэр хүнд, итгэлцэл нэмэгдэх зэрэг олон талын ач холбогдолтой юм.
Энэхүү сургалт нь Монгол Улсад ESG-ийн ойлголт, хэрэгжилтийг түгээн дэлгэрүүлэх, байгууллагуудын тогтвортой хөгжлийн чадавхыг бэхжүүлэхэд чухал хувь нэмэр оруулж байгаа бөгөөд цаашид бэлтгэгдсэн сургагч багш нарын оролцоотойгоор ESG-ийн мэдлэг, туршлага бизнесийн салбарт өргөн хүрээнд түгэнэ гэж үзэж байна.
Тус сургалтыг Филиппин Улсаас хүрэлцэн ирсэн олон улсын сургагч Daniella Reyes, Олон Улсын Хөдөлмөрийн Байгууллага (ОУХБ)-ын Ажил олгогчийн үйл ажиллагаа хариуцсан товчооны ахлах мэргэжилтэн Wade Bromley, мөн хөтөлбөр, үйл ажиллагаа хариуцсан мэргэжилтэн Laura Greene нар удирдан зохион байгууллаа.
