МОНГОЛЫН ХҮНС ҮЙЛДВЭРЛЭГЧИД “SIAL CANADA 2026”-Д АМЖИЛТТАЙ ОРОЛЦОЖ, ХОЙД АМЕРИКИЙН ЗАХ ЗЭЭЛД ШИНЭ БОЛОМЖ НЭЭЛЭЭ
Монголын Үндэсний Худалдаа Аж Үйлдвэрийн Танхим (МҮХАҮТ)-аас санаачлан зохион байгуулсан дотоодын аж ахуйн нэгжүүдийн төлөөлөл Канад улсын Монреаль хотноо 2026 оны дөрөвдүгээр сарын 29-нөөс тавдугаар сарын 1-ний өдрүүдэд зохион байгуулагдсан “SIAL Canada 2026” олон улсын үзэсгэлэнд амжилттай оролцлоо.
Энэхүү оролцоо нь Монголын хүнс үйлдвэрлэгчдийг Хойд Америкийн зах зээлд таниулах, экспортын шинэ гарцыг нээх, дэлхийн түвшний стандарт, чиг хандлагыг судлах чухал алхам боллоо. “SIAL Canada” нь Хойд Америкийн хүнсний салбарын нэр хүндтэй үзэсгэлэн бөгөөд энэ удаад дэлхийн 55 орны 800 гаруй компани, 23,000 гаруй салбарын мэргэжилтэн, худалдан авагчдыг нэг дор цуглуулсан өргөн цар хүрээтэй арга хэмжээ байв.
Үзэсгэлэнгийн хүрээнд МҮХАҮТ-аас зохион байгуулсан бизнес уулзалтууд нь оролцогч компаниудад бодит үр дүн авчирсан чухал хэсэг байлаа. Монгол Улсаас Монреаль хотод суугаа Өргөмжит консул Пол Лэми, Оттава хот дахь Элчин сайд Э.Сарантогос нар Монголын төлөөлөгчдийг хүлээн авч уулзан, хоёр улсын худалдаа, эдийн засгийн хамтын ажиллагааг өргөжүүлэхэд дэмжлэг үзүүлэхээ илэрхийлсэн нь цаашдын хамтын ажиллагаанд чухал түлхэц болов.
Мөн Канад-Монголын Худалдаа Аж Үйлдвэрийн Танхим болон “Trade Facilitation Office (TFO) Canada” байгууллагатай хийсэн уулзалтууд нь Монгол Улсаас экспортлох бүтээгдэхүүний нэр төрлийг нэмэгдүүлэх, зах зээлд нэвтрэх боломжийг бодитоор тодорхойлоход чиглэв.
Түүнчлэн сав баглаа боодлын орчин үеийн үйлдвэр болон Канад дахь Монголын ноос, ноолууран бүтээгдэхүүний борлуулалтын “Cashmere Casa” дэлгүүрийн үйл ажиллагаатай танилцсан нь бүтээгдэхүүний чанар, стандарт, хэрэглэгчийн шаардлагыг бодитоор ойлгох боломжийг бүрдүүллээ.
“SIAL Canada 2026” үзэсгэлэнд МҮХАҮТ-ын Гүйцэтгэх захирал Ц.Магнайбаатараар ахлуулсан Мон-Тува, Гантиг Мах, Амид Ложистик, Мандала Ай Юу, Номад Базаар, Пума Сервис, Чингүүнбат зэрэг компаниуд оролцож, бүтээгдэхүүнээ танилцуулан, олон улсын худалдан авагчидтай шууд харилцаа тогтоож, хамтын ажиллагааны эхлэлүүдийг тавьсан нь онцлох үр дүн байлаа.
Энэхүү оролцоо нь Монголын хүнсний салбарын экспортын чадавхыг нэмэгдүүлэх, үйлдвэрлэгчдийг дэлхийн зах зээлд өрсөлдөхөд бэлтгэх, улмаар “Монголд үйлдвэрлэв” брэндийн үнэ цэнийг олон улсын тавцанд нэмэгдүүлэхэд бодит хувь нэмэр оруулсан чухал үйл явдал боллоо.
