ХОСМОГ СУРГАЛТЫГ ТАНИЛЦУУЛАХ, ТӨР-ХУВИЙН ХЭВШЛИЙН ТҮНШЛЭЛИЙГ БЭХЖҮҮЛЭХ ӨДӨРЛӨГ АМЖИЛТТАЙ ЗОХИОН БАЙГУУЛАГДЛАА

“Орон нутагт хосмог сургалтыг хэрэгжүүлэх, төр-хувийн хэвшлийн түншлэлийн тогтолцоог бэхжүүлэх” нээлттэй өдөрлөг, сургалт, семинарууд 2026 оны 4 дүгээр сарын 20–29-ний өдрүүдэд Орхон аймаг дахь Политехникийн коллеж, ШУТИС-ийн харьяа Хөвсгөл аймаг дахь политехник коллеж, Зүүнхараа Политехникийн коллежид амжилттай зохион байгуулагдлаа.

Энэхүү арга хэмжээ нь мэргэжлийн болон техникийн боловсрол, сургалтын байгууллагууд (МБСБ), олон нийт, ажил олгогч нарт хосмог сургалтын тогтолцоог танилцуулах, мөн төр-хувийн хэвшлийн түншлэлийн механизмыг боловсронгуй болгоход чиглэв.

Үйл ажиллагааны хүрээнд:

• Аж ахуйн нэгж, боловсролын байгууллагын хамтын ажиллагаанд тулгуурлан зөв төлөвшил, эерэг хандлага, мэргэжлийн өндөр ур чадвартай залуу үеийг бэлтгэх арга замыг танилцууллаа.
• Аж ахуйн нэгжүүд болон сургалтын байгууллагуудын хооронд хамтын ажиллагааны санамж бичгүүд байгуулж, түншлэлийг бодит хэрэгжилтийн түвшинд ахиуллаа.
• Политехник коллежуудад мэргэжлийн зөвлөлийг байгуулж, салбарын оролцоог институцийн түвшинд бэхжүүлэх, тэдгээрийн үйл ажиллагаатай танилцан цаашдын хөгжлийн чиглэлийг тодорхойлов.
• Сонгогдсон мэргэжлүүдийн хүрээнд сургалтын хэрэгцээ, элсэлтийн квотыг тодорхойлж, хөдөлмөрийн зах зээлийн эрэлтэд суурилсан төлөвлөлтийг эхлүүлэв.

Мөн зөвхөн сургалтын шинэ хэлбэрийг нэвтрүүлэхээс гадна төр, хувийн хэвшлийн хамтын ажиллагааг бодитойгоор бэхжүүлж, хөдөлмөрийн зах зээлийн эрэлт, шаардлагад нийцсэн хүний нөөцийг бэлтгэхэд чухал ач холбогдолтой юм. Улмаар боловсролын салбараас бэлтгэгдэх ажиллах хүчний нийлүүлэлтийн тогтолцоог сайжруулах, төрийн байгууллагын үйл ажиллагааны үр ашгийг нэмэгдүүлэхэд чиглэж байна. Энэхүү зорилтыг хэрэгжүүлэхэд аж ахуйн нэгж, байгууллагуудын оролцоо чухал бөгөөд хосмог сургалтын тогтолцоогоор ажиллах хүч бэлтгэх сонирхолтой байгууллагуудын төлөөлөл идэвхтэй оролцлоо.

Тус арга хэмжээг Боловсролын яам, Боловсролын ерөнхий газар, Монголын Үндэсний Худалдаа Аж Үйлдвэрийн Танхим болон Германы Олон Улсын Хамтын Ажиллагааны Нийгэмлэг (GIZ)-ийн ТСТМБС-II төсөл хамтран зохион байгууллаа.