МҮХАҮТ БОЛОН ОУХБ-ЫН ТӨЛӨӨЛӨГЧИД АЖИЛ ОЛГОГЧДЫН ОРОЛЦООГ ОЛОН УЛСЫН ТҮВШИНД БЭХЖҮҮЛЭХ АСУУДЛААР ХЭЛЭЛЦЛЭЭ
Монголын Үндэсний Худалдаа Аж Үйлдвэрийн Танхим (МҮХАҮТ)-ын удирдлагууд Олон улсын хөдөлмөрийн байгууллага (ОУХБ)-ын төлөөлөгчидтэй уулзаж, ажил олгогчдын оролцоог бэхжүүлэх, олон улсын хамтын ажиллагааг тэлэх болон ирээдүйн хамтарсан төсөл, хөтөлбөрүүдийн талаар санал солилцлоо.
Түүнчлэн МҮХАҮТ-ын Олон улсын ажил олгогчдын байгууллага (IOE)-ын гишүүнчлэлийн давуу талыг хэрхэн үр дүнтэй ашиглах, олон улсын сүлжээнд идэвхтэй оролцох боломжуудыг онцлон ярилцлаа. Ялангуяа Олон улсын хөдөлмөрийн бага хуралд (ILC) Монголын ажил олгогчдын дуу хоолойг хүргэх, олон улсын түвшинд хувийн хэвшлийн оролцоог нэмэгдүүлэх асуудал хэлэлцүүлгийн төвд байв. Энэхүү түншлэл нь Монголын бизнесийн орчинд олон улсын стандарт, шилдэг туршлагыг нутагшуулах чухал хөшүүрэг болохыг онцлов.
Мөн уулзалтаар нийлүүлэлтийн сүлжээн дэх хөдөлмөр эрхлэлт, ESG зарчмуудыг нэвтрүүлэх болон хөдөлмөрийн хариуцлагатай менежментийг төлөвшүүлэх талаар болон МҮХАҮТ-аас хэрэгжүүлж буй төсөл, хөтөлбөрүүдийн үр дүнг танилцуулж, цаашид судалгаа шинжилгээний салбарт түншлэлээ улам бүр гүнзгийрүүлэх талаар ярилцлаа.
