МҮХАҮТ-аас анх удаа групп зохион байгуулан Канад улсын Монтреал хотноо болж буй "SIAL Canada 2026" олон улсын хүнсний үзэсгэлэнд амжилттай оролцож байна.

Арга хэмжээний хүрээнд /2026.04.27/ Монтреал дахь Өргөмжит консул Пол Лэми МҮХАҮТ-ын Гүйцэтгэх захирал Ц.Магнайбаатар болон бизнесийн группын төлөөллийг хүлээн авч уулзлаа. Уулзалтаар талууд хоёр орны бизнес хамтын ажиллагааг идэвхжүүлэх, тэр дундаа Монголоос Канад руу чиглэсэн экспортын боломжуудыг дэмжих талаар санал солилцсон юм.

Мөн энэ өдөр МҮХАҮТ-ын бизнес групп Канад улсад үйл ажиллагаа явуулдаг хүнсний сав баглаа боодлын үйлдвэртэй танилцлаа. Тус үйлдвэрт Монгол мэргэжилтнүүд ажиллаж, Хойд Америкийн өндөр стандартын дагуу технологийн дамжлагыг удирдан чиглүүлж байгаа нь онцлог байв. Группийн бүрэлдэхүүн үйлдвэрийн үйл ажиллагаатай танилцаж, байгальд ээлтэй сав баглаа боодлын технологийн талаар туршлага судалж, амжилт хүслээ.

"SIAL Canada" нь Дэлхийн 60 гаруй орны хүнс үйлдвэрлэгчид цуглардаг томоохон талбар бөгөөд олон улсын зах зээлийн чиг хандлага болон экспортын шинэ гарцуудыг газар дээр нь судлах боломж бүрдэж байгаа юм.