БҮГД НАЙРАМДАХ КАЗАХСТАН УЛСЫН АГРОФИРМА “РОДИНА” ХӨДӨӨ АЖ АХУЙН БҮС БОЛОН "ЦЕСНА" АГРО АЖ ҮЙЛДВЭРТЭЙ ТАНИЛЦЛАА

Төрийн тэргүүний айлчлалын хүрээнд бизнес төлөөлөгчдийн баг Бүгд Найрамдах Казахстан Улсын Агрофирма “Родина” хөдөө аж ахуйн бүс болон “Цесна” агро аж үйлдвэртэй танилцлаа.

Казахстан улсын Акмолын мужид байрлах Агрофирма “Родина” нь 1961 онд байгуулагдсан, хөдөө аж ахуйн салбарын томоохон, олон чиглэл бүхий компани юм.

Мал аж ахуйн чиглэлээр сүүний чиглэлийн үхрийн аж ахуйг хөгжүүлж, жилд 8000 гаруй тонн сүү үйлдвэрлэх хүчин чадалтай. Мөн өөрийн сүү боловсруулах үйлдвэртэй бөгөөд төрөл бүрийн сүүн бүтээгдэхүүнийг дотоодын зах зээлд нийлүүлдэг.

Тус аж ахуй нь зөвхөн үйлдвэрлэл эрхэлдэг төдийгүй ажилтан, иргэдийн амьдрах орчныг цогцоор нь шийдсэн жишиг суурин байгуулснаараа онцлог. “Родина” тосгонд сургууль, цэцэрлэг, спорт цогцолбор, соёл үйлчилгээний төв, орон сууц, инженерийн дэд бүтцийг бүрдүүлж, хөдөө орон нутгийн тогтвортой хөгжлийн загварыг бий болгосон байна.

Харин “Цесна” групп нь үр тариа боловсруулах, гурил, гоймон, хүнсний бүтээгдэхүүний үйлдвэрлэлээрээ тус улсын стратегийн ач холбогдол бүхий үйлдвэрлэгчдийн нэгт тооцогддог. Үр тарианаас эцсийн бүтээгдэхүүн хүртэлх нэгдсэн тогтолцоог бүрдүүлсэн агро үйлдвэрлэлийн цогц бүтэцтэйгээрээ онцлог юм.

Тус компани орчин үеийн өндөр хүчин чадалтай тээрэм, боловсруулах үйлдвэрүүдэд тулгуурлан гурил, гоймон, төрөл бүрийн үр тарианы бүтээгдэхүүн үйлдвэрлэж, дотоодын хүнсний хангамжийг хангахаас гадна экспортын зах зээлд нийлүүлэлт хийдэг.

Үйлдвэрлэлийн шат бүрт чанар, аюулгүй байдлын стандартыг мөрдсөн, инноваци, технологид суурилсан хөгжлийн загвараараа тус компани нь агро үйлдвэрлэл, хүнсний боловсруулах салбарын амжилттай туршлага болж байна.