МОНГОЛ-КАЗАХСТАНЫ БИЗНЕС ФОРУМ АМЖИЛТТАЙ БОЛЛОО
Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Казахстан Улсад хийж буй төрийн айлчлалд МҮХАҮТ-ын Ерөнхийлөгч Б.Лхагважав 90 гаруй аж ахуй нэгжийн төлөөлөл бүхий бизнес группийг ахлан оролцсон бөгөөд 2026 оны 04 сарын 21-ний өдөр Астана хотноо Монгол-Казахстаны бизнес форумыг зохион байгууллаа.
Бизнес форумд Монгол Улсын талаас 90 гаруй аж ахуйн нэгжийн 100 гаруй бизнес эрхлэгчид БНКазУ-ын талаас 150 гаруй бизнес эрхлэгчид оролцож байна.Хоёр улсын хүнс, хөдөө аж ахуй, хөнгөн үйлдвэр, ноос ноолуур, барилга, тээвэр логистик, банк санхүүгийн салбарын төлөөллүүд харилцан мэдээлэл солилцож, хамтран ажиллах боломжийн талаар бизнес уулзалт хийсэн юм.
Бизнес форумын нээлтэд Бүгд Найрамдах Казахстан Улсын Шадар сайд бөгөөд Үндэсний эдийн засгийн сайд С.Жумангарин, Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр, МҮХАҮТ-ын Ерөнхийлөгч Б.Лхагважав, Бүгд Найрамдах Казахстан Улсын Гадаад Худалдааны Танхимын Удирдах зөвлөлийн дарга Каримсаков.М, Кызылорда мужийн Засаг даргын орлогч А.Зебешев, Баян-Өлгий аймгийн Засаг дарга Е.Зангар болон хоёр улсын бизнес эрхлэгчид оролцлоо.
Форумын үеэр МҮХАҮТ-ын Ерөнхий нарийн бичгийн дарга Б.Саруул Монголын бизнесийн орчны талаар илтгэл тавилаа. Тус бизнес форум нь Монгол Казахстаны худалдаа, эдийн засгийн хамтын ажиллагааг өргөжүүлэх, бизнес эрхлэгчдийн хамтын ажиллагааг идэвхижүүлэх чухал арга хэмжээ болж байгаа бөгөөд Бизнес форум хоёр улсын бизнес эрхлэгчдийн B2B уулзалтаар үргэлжлэн өндөрлөлөө.
