МОНГОЛ–ПОЛЬШИЙН БИЗНЕС УУЛЗАЛТ ВАРШАВ ХОТОД АМЖИЛТТАЙ ЗОХИОН БАЙГУУЛАГДЛАА
Бүгд Найрамдах Польш Улсын Варшав хот дахь Ази, Номхон далайн музейд “Монгол–Польшийн бизнес уулзалт” амжилттай зохион байгуулагдаж, хоёр улсын эдийн засаг, худалдааны хамтын ажиллагааг өргөжүүлэх чухал алхам боллоо. Тус арга хэмжээг Монгол Улсаас БНПУ-д суугаа Онц бөгөөд Бүрэн эрхт Элчин сайд Н.Оюундарь, Монгол–Польшийн парламентын бүлгийн дарга ноён Ж.Золжаргал, Польш–Монголын парламентын бүлгийн дэд дарга Марек Ржонса нар нээж, хоёр орны бизнесийн хэлхээ холбоог бэхжүүлэхийн ач холбогдлыг тэмдэглэв.
Уулзалтад Монголын Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав уул уурхай, эм зүй, хөдөө аж ахуйн салбарын 30 орчим төлөөлөгчөөс бүрдсэн бизнесийн багийг ахлан оролцож, Польшийн талтай түншлэлийн шинэ боломжуудыг эрэлхийллээ. Арга хэмжээний үеэр МҮХАҮТ-ын Ерөнхийлөгчийн зөвлөх М.Сарандаваа Монгол Улсын эдийн засгийн өнөөгийн байдал болон гадаад худалдааны бодлогын талаар танилцуулга хийсэн бол Польшийн Хөрөнгө оруулалт, худалдааны агентлаг (PAIH) болон KUKE байгууллагууд өөрийн орны хөрөнгө оруулалтын орчны давуу талуудыг танилцуулсан юм.
Энэхүү айлчлалын нэгэн гол үр дүн нь эрүүл мэндийн салбарын хамтын ажиллагааг эрх зүйн хүрээнд баталгаажуулсан явдал байлаа. Тодруулбал, Монгол Улсын Эм, эмнэлгийн хэрэгслийн хяналт, зохицуулалтын газрын дарга П.Алтанцэцэг болон БНПУ-ын холбогдох агентлагийн Ерөнхийлөгч Гжегож Чессак нар хамтын ажиллагааны “Замын зураглал”-д гарын үсэг зурлаа. Түүнчлэн талууд хөдөө аж ахуй, уул уурхай, шинжлэх ухааны чиглэлээр хамтын ажиллагааг гүнзгийрүүлэх боломжийг онцлон хэлэлцэж, B2B уулзалтуудаар дамжуулан хоёр орны аж ахуйн нэгжүүд шууд харилцаа тогтоож, шинэ түншлэлийн суурийг тавьсан үр дүнтэй арга хэмжээ боллоо.
