МОНГОЛ-ПЕНЗА: БИЗНЕС ТҮНШЛЭЛИЙГ САНАМЖ БИЧГЭЭР БАТАЛГААЖУУЛАВ
МҮХАҮТ-ын Гүйцэтгэх захирал Ц.Магнайбаатар болон ОХУ-ын Пенза мужийн Экспортыг дэмжих төвийн дарга Попова Елена нар хоёр талын хамтын ажиллагааг албажуулж, хамтран ажиллах санамж бичигт гарын үсэг зурлаа.
Энэхүү баримт бичиг нь Монгол Улс болон Пенза муж хоорондын худалдаа, эдийн засгийн харилцааг шинэ шатанд гаргах, бизнес эрхлэгчдийг мэдээллээр хангах, үзэсгэлэн яармаг зохион байгуулах болон экспортын шинэ гарцуудыг нээхэд гол тулгуур болох юм. Санамж бичгийн хүрээнд талууд хүнс, эрчим хүч болон гоо сайхны салбарт түлхүү хамтран ажиллаж, бизнес эрхлэгчдийн хоорондын шууд холбоог бэхжүүлэхээр тохиролцов. МҮХАҮТ-ын зүгээс Евразийн эдийн засгийн холбооны хүрээнд нээгдэж буй боломжуудыг ашиглан дотоодын үйлдвэрлэгчдээ ОХУ-ын зах зээлд гаргахад энэхүү түншлэл чухал дэмжлэг болно гэдгийг онцолсон юм.
