МОНГОЛ, ОРОСЫН БИЗНЕС ЭРХЛЭГЧИД ХАМТЫН АЖИЛЛАГААНЫ ШИНЭ ГАРЦУУДЫГ ТОДОРХОЙЛОВ
Монголын Үндэсний Худалдаа Аж Үйлдвэрийн Танхимд ОХУ-ын Пенза мужийн экспортыг дэмжих төвийн төлөөлөгчид болон тус улсын бизнес эрхлэгчдийн бүрэлдэхүүнтэй ажил хэргийн уулзалт амжилттай зохион байгуулагдлаа.
Уулзалтыг МҮХАҮТ-ын дэд захирал Ч.Баттулга чиглүүлэн модератороор ажиллаж, талуудын хэлэлцүүлгийг нээлттэй өрнүүлэв.
Уулзалтыг МҮХАҮТ-ын Гүйцэтгэх захирал Ц.Магнайбаатар нээж үг хэлэхдээ хоёр улсын худалдаа, эдийн засгийн хамтын ажиллагааг шинэ шатанд гаргах, ялангуяа бүс нутаг хоорондын түншлэлийг идэвхжүүлэх нь чухал ач холбогдолтойг онцолсон юм. Тэрээр хэлсэн үгэндээ манай улсын бизнес эрхлэгчид Евразийн эдийн засгийн холбоотой байгуулсан чөлөөт худалдааны хэлэлцээр болон бусад эрх зүйн таатай боломжуудыг соргогоор ашиглан, гадаад зах зээл дэх үйл ажиллагаагаа тэлэх, экспортын гарцаа нэмэгдүүлэхэд анхаарах хэрэгтэйг санууллаа.
Энэхүү арга хэмжээнд ОХУ-ын Пенза мужийн экспортыг дэмжих төвийн дарга Попова Елена болон хүнсний үйлдвэрлэл, эрчим хүч, гоо сайхны салбарын төлөөллүүд оролцож, өөрсдийн үйл ажиллагаа, хамтран ажиллах боломжит саналуудаа танилцууллаа.
Уулзалтын гол хэсэг нь бизнес эрхлэгчдийн хоорондын шууд харилцааг тогтоох B2B уулзалтууд байсан бөгөөд талууд харилцан ашигтай хамтын ажиллагааг эхлүүлэх, хөрөнгө оруулалт болон бараа бүтээгдэхүүн нийлүүлэх талаар санал солилцсон юм.
МҮХАҮТ-ын зүгээс гадаад харилцааг өргөжүүлэх замаар дотоодын компаниудаа дэмжих, олон улсын зах зээлд өрсөлдөх чадварыг нь дээшлүүлэх чиглэлд идэвхтэй ажиллаж байгааг энэ үеэр тэмдэглэлээ. Төлөөлөгчдийн айлчлал нь хоёр улсын хоорондын бизнес түншлэлийг бэхжүүлэх, шинэ зах зээлд нэвтрэх бодит боломжуудыг нээсэн үр дүнтэй арга хэмжээ боллоо.
