ШИНЭЭР ТОМИЛОГДСОН ЭЛЧИН САЙД НАРТАЙ БИЗНЕС УУЛЗАЛТ ХИЙЛЭЭ
Гадаад харилцааны яамны “Зөвшилцөл” танхимд төр, хувийн хэвшлийн төлөөллүүд болон шинээр томилогдсон Элчин сайд нарын уулзалт боллоо. Энэхүү уулзалтаар Монгол Улсын гадаад худалдааг өргөжүүлэх, хөрөнгө оруулалт татах болон экспортын шинэ гарцуудыг нээх талаар талууд нээлттэй ярилцав.
Уулзалтын эхэнд МҮХАҮТ-ын Ерөнхийлөгч Б.Лхагважав бизнесийн орчныг сайжруулахад хувийн хэвшлийн оролцоо ямар чухал болохыг тэмдэглэсэн юм. Үүний дараа ЖДҮГ-ын дарга Я.Эрдэнэсайхан жижиг, дунд үйлдвэрлэгчид олон улсын зах зээлд хэрхэн нэвтрэх боломжтой талаар мэдээлэл өгсөн бол МҮХАҮТ-ын Ерөнхий нарийн бичгийн дарга Б.Саруул хөрөнгө оруулалтын орчин болон удахгүй болох олон улсын үзэсгэлэн, айлчлалуудыг танилцууллаа.
Мөн Монголын арьс ширний үйлдвэрлэлийн холбооны Ерөнхийлөгч А.Даваасүрэн салбарын экспортын боломж, цаашдын чиг хандлагын талаар илтгэл тавьсан юм.
Танилцуулгуудын дараа оролцогчид чөлөөт хэлэлцүүлэг өрнүүлж, тулгамдаж буй асуудлууд болон хамтын ажиллагааны талаар санал солилцлоо. Энэхүү уулзалт нь төр, хувийн хэвшил болон дипломат төлөөлөгчид нягт холбоотой ажиллаж, улс орны эдийн засгийн хамтын ажиллагааг идэвхжүүлэхэд ач холбогдолтой арга хэмжээ болов.
