МҮХАҮТ-ЫН ЕРӨНХИЙЛӨГЧ Б.ЛХАГВАЖАВ БНКИРУ-ААС МОНГОЛ УЛСАД СУУГАА ЭЛЧИН САЙД АЙБЕК МОЛДОГАЗИЕВЫГ ХҮЛЭЭН АВЧ УУЛЗЛАА
Монгол Үндэсний Худалдаа Аж Үйлдвэрийн Танхимын Ерөнхийлөгч Б.Лхагважав Бүгд Найрамдах Киргиз Улсаас Монгол Улсад суугаа Онц бөгөөд Бүрэн эрхт Элчин сайд Молдогазиев Айбек Бейшеевичыг хүлээн авч уулзан, хоёр улсын эдийн засаг, бизнесийн хамтын ажиллагааг шинэ шатанд гаргах талаар санал солилцлоо.
Уулзалтын эхэнд талууд Монгол, Киргиз хоёр улсын худалдааны эргэлт одоогоор хангалтгүй түвшинд байгааг тэмдэглээд, цаашид үүнийг нэмэгдүүлэх өргөн боломж байгааг онцолсон юм. Ялангуяа аж ахуйн нэгж хоорондын шууд холбоог тогтооход Танхимуудын оролцоог идэвхжүүлэх, зах зээлийн харилцан мэдээлэл солилцох тогтолцоог бүрдүүлэх нь нэн тэргүүний зорилт болоод байна.
Элчин сайд Айбек Молдогазиев Киргиз улсын зүгээс Монгол Улстай хөдөө аж ахуй, хөнгөн үйлдвэр болон логистикийн салбарт хамтран ажиллах сонирхолтой байгаагаа илэрхийлсэн юм. Энэхүү зорилтын хүрээнд хоёр талын бизнес эрхлэгчдийг нэгтгэсэн "Бизнес форум"-ыг ойрын хугацаанд зохион байгуулах, харилцан туршлага судлах айлчлалуудыг тогтмолжуулах замаар хамтын ажиллагааг эрчимжүүлэхээр тохиролцов.
