МОНГОЛ БОЛОН АЛБАНИ УЛСЫН ХУДАЛДААНЫ ЭРГЭЛТИЙГ ШИНЭ ШАТАНД ГАРГАХ БОДИТ БОЛОМЖУУД НЭЭГДЛЭЭ
МҮХАҮТ-ын Ерөнхийлөгч Б.Лхагважав Бүгд Найрамдах Албани Улсын Онц бөгөөд Бүрэн Эрхт Элчин Сайд ноён Риза Пода тэргүүтэй төлөөллийг хүлээн авч уулзан хоёр улсын эдийн засаг, бизнесийн хамтын ажиллагааг өргөжүүлэх боломжуудыг хэлэлцлээ.
Уулзалтын үеэр Монгол Улсын гадаад худалдаа, хөрөнгө оруулалтын таатай орчныг танилцуулж, уул уурхайн салбарын нөөц боломжоос гадна ноолуур болон малын гаралтай бүтээгдэхүүний экспортын өрсөлдөх чадвар өндөр байгааг онцлон тэмдэглэв. Түүнчлэн аялал жуулчлалын салбарт жуулчдын урсгалыг харилцан нэмэгдүүлэх сонирхлоо талууд илэрхийлж, хөдөө аж ахуй, эрчим хүч, уул уурхайг хамтын ажиллагааны тэргүүлэх чиглэлээр тодорхойллоо.
Цаашид Албани улсын Танхимын удирдлагыг Монгол Улсад айлчлуулах, төр болон хувийн хэвшлийн төлөөлөгчдийн харилцан туршлага солилцох ажил хэргийн айлчлалуудыг зохион байгуулах боломжийг судлахаар тогтсон юм. Энэхүү уулзалт нь хоёр улсын бизнес эрхлэгчид харилцан ашигтай түншлэл тогтоож, эдийн засгийн харилцаагаа бодитоор идэвхжүүлэх чухал эхлэл болж байна. Уулзалтад ЕНБД Б.Саруул болон холбогдох албаны хүмүүс байлцлаа.
