МҮХАҮТ БОЛОН ШУА ИННОВАЦЫГ ҮЙЛДВЭРЛЭЛД НЭВТРҮҮЛЭХ ХАМТЫН АЖИЛЛАГААГ ЭХЛҮҮЛЛЭЭ
Монголын Үндэсний Худалдаа Аж Үйлдвэрийн Танхим болон Монгол Улсын Шинжлэх Ухааны Академи хооронд байгуулсан энэхүү хамтын ажиллагааны санамж бичиг нь "Алсын хараа-2050", "Шинэ сэргэлтийн бодлого" зэрэг улс орны урт хугацааны хөгжлийн стратегийг бодит ажил хэрэг болгох, мэдлэгт суурилсан эдийн засгийг цогцлооход чиглэсэн ач холбогдолтой алхам боллоо.
Энэхүү санамж бичигт МҮХАҮТ-ын Ерөнхийлөгч Б.Лхагважав, ШУА-ийн Ерөнхийлөгч С.Дэмбэрэл нар гарын үсэг зурснаар талууд ирэх гурван жилийн хугацаанд инновац, техник технологи болон үйлдвэрлэл, бизнесийн салбарт хүчээ нэгтгэхээр албан ёсоор тохиролцов. Энэхүү түншлэлийн хүрээнд эрдэмтэн судлаачдын олон жилийн нөр их хөдөлмөрөөр бүтсэн шинэ бүтээл, патент, судалгааны үр дүнгүүдийг үйлдвэрлэлд шууд нэвтрүүлэх, гарааны компани болон инновацын төслүүдийг санхүүжүүлэх механизмыг хамтран боловсруулж, дотоодын түүхий эдэд суурилсан, олон улсын стандартад нийцсэн өрсөлдөх чадвартай бүтээгдэхүүн үйлдвэрлэхэд гол анхаарлаа хандуулах юм. Мөн Монгол орны өвөрмөц онцлогт тохирсон техник технологийг нутагшуулах, байгальд ээлтэй, хаягдалгүй ногоон эдийн засгийг хөгжүүлэх замаар аж үйлдвэрийн салбарын үр ашгийг нэмэгдүүлэхээр төлөвлөж байна.
Гарын үсэг зурах ёслолын үеэр МҮХАҮТ-ын Ерөнхийлөгч Б.Лхагважав "Өнөөдөр манай бизнес эрхлэгчдэд зөвхөн санхүүгийн дэмжлэг бус, шинжлэх ухааны үндэслэлтэй ноу-хау, дэвшилтэт технологи хамгийн их хэрэгтэй байна. ШУА-тай байгуулж буй энэхүү санамж бичиг нь эрдэмтдийнхээ мэдлэг, оюуны бүтээлийг баялаг бүтээгчидтэй холбох гүүр болно. Бид хамтдаа дотоодын түүхий эдээ гүн боловсруулж, олон улсын зах зээлд өрсөлдөхүйц брэндүүдийг төрүүлэн гаргах бодит боломжийг бүрдүүлж байна" хэмээн онцолсон бол,
ШУА-ийн Ерөнхийлөгч С.Дэмбэрэл "Шинжлэх ухааны салбар дангаараа хөгжих боломжгүй, судалгаа шинжилгээний үр дүн заавал үйлдвэрлэлд нэвтэрч, эдийн засгийн үр ашиг авчрах ёстой. МҮХАҮТ-тай хамтран ажилласнаар эрдэмтэн, судлаачдын маань патент, инновацын төслүүд санхүүжилтийн эх үүсвэртэй холбогдож, практик талбарт туршигдах үүд хаалга нээгдэж байна гээд энэ бол Монгол Улсын хөгжлийн бодлогыг шинжлэх ухааны үндэслэлтэйгээр урагшлуулах том алхам юм" гэдгийг тэмдэглэлээ.
Цаашид талууд импортыг орлох бүтээгдэхүүний үйлдвэрлэлийг кластерын зарчмаар хөгжүүлэх, залуучуудын бизнес эрхлэлтийг инновацад тулгуурлан дэмжих, хамтарсан үзэсгэлэн болон сурталчилгааны арга хэмжээг тогтмол зохион байгуулж, шинжлэх ухаан ба бизнесийн салбарын уялдаа холбоог шинэ түвшинд гаргахаар санал нэгдсэн юм.
