ХҮНС, НООЛУУР, СОЁЛЫН САЛБАР ЭДИЙН ЗАСГИЙН ХАМТЫН АЖИЛЛАГААНЫ ШИНЭ ТАЛБАР БОЛНО

Монгол-Францын эдийн засгийн харилцаа уламжлалт салбаруудаас хальж, нэмүү өртөг шингэсэн уул уурхайн бус экспортыг дэмжих шинэ шатанд шилжиж байна. МҮХАҮТ-ын Ерөнхий нарийн бичгийн дарга Б.Саруул БНФУ-аас Монгол Улсад суугаа Онц бөгөөд Бүрэн эрхт Элчин сайд, хатагтай Коринн Пэрера Да Силваг хүлээн авч уулзсан бөгөөд уулзалтын гол цөм нь хоёр улсын эдийн засгийн хамтын ажиллагааг идэвхжүүлэх, тэр дундаа Францын хөрөнгө оруулагчдын сонирхлыг Монголын зах зээлд чиглүүлэхэд оршив.

Сүүлийн жилүүдэд хоёр орны эдийн засгийн түншлэл идэвхжиж, Францын компаниудын Монгол Улсад чиглэсэн сонирхол нэмэгдэж байгааг талууд онцолсон юм. Үүний нэг тод жишээ нь 2024 оны 10 дугаар сард Францын бизнесийн төлөөлөгчид Монгол Улсад айлчилж, МҮХАҮТ-аас бизнес форумыг амжилттай зохион байгуулсан явдал бөгөөд уг арга хэмжээ нь цаашдын хамтын ажиллагааны суурийг тавьж, тодорхой төслүүд хэрэгжих эхлэл болжээ.

2026 онд энэхүү харилцаа улам эрчимжихээр хүлээгдэж байгаа бөгөөд дэд бүтэц, эрчим хүч, тээвэр, хүнс, соёлын чиглэлээр Францын бизнесийн томоохон айлчлал, арга хэмжээнүүд зохион байгуулагдахаар төлөвлөгдөж байна. Эдгээр арга хэмжээний хүрээнд бизнес уулзалт, B2B хэлэлцээрүүд өрнөж, хоёр улсын хувийн хэвшлийнхнийг холбох бодит гүүр болох юм. Түүнчлэн хамтын ажиллагаа хөдөө аж ахуй, хүнс, ноолуур, органик бүтээгдэхүүн зэрэг уул уурхайн бус салбарт өргөжиж байгаа нь Монголын бүтээгдэхүүнийг Европын зах зээлд гаргах шинэ үүд хаалгыг нээж байна. Уулзалтын төгсгөлд талууд Монгол-Францын эдийн засгийн түншлэл зөвхөн төрийн хэмжээнд бус, хувийн хэвшлийн бодит төслүүдээр дамжин урт хугацаанд тогтвортой өргөжин тэлнэ гэдэгт итгэлтэй байгаагаа илэрхийлэв.